OHANGWENA Amushanga Omukuluntu mUuministeli wOmalelo gOpaitopolwa, Oondoolopa, Omagumbo nOmapendulopo gOkomikunda, Erastus Negonga oti indile Elelo lyOndoolopa Helao Nafidi li tameke noonkundathana pamwe naakalimo yomondoolopa ndjika. Mokupopitha oshigongi pOhangwena omathimbo ga zi ko shi nasha nokutotha mo omaupyakadhi, Negonga ota ti shimwe shomiiyetithi yomahololodhiladhilo nomanyenyeto gaakalimo kUuministeli osha ningwa molwashoka elelo lyondoolopa ndjika inali ya mekwatathano li ihwapo naakwashigwana nelalakano okukandula po omaupyakadhi ga tumbulwa momukanda gomanyenyeto. Nonando Negonga okwe shi zimina kutya etameko aluhe edhigu, aakalimo okwa li ya pumbwa okupewa omauyelele nokundungikwa nawa kombinga yiilonga iipe yomapendulopo mbyoka ye ya guma. Amushanga ota ti aakwashigwana okwa li ye na okukundathanwa nayo kuyele nokutseyilwa kutya uunake nankene taya ka tembudhwa nofuto ndjoka ye na okupewa ndjoka ya kwatela mo omaliko gawo agehe ga kwatela mo omiti dhoka dhi li momapya gawo. Negonga ota ti uuministeli owa limbililwa omapopyo omawinayi taga zi mondoolopa Helao Nafidi. Ota ti ondoolopa oya ninga “omukundu” unene nuuministeli otau ipula kutya omolwashike oyo awike mokati komalelo 49 goondoolopa moshilongo. Helao Nafidi oye awike ta gandja uupyakadhi kuyo unene okuza moNooli yoshilongo. Mokati komalelo gopaendoolopa ge li 49, uuministeli owa yakula ashike omikanda dhomanyenyeto dhi li ndatu omathimbo ga za ko. Omikanda mbali odha za koondoolopa dhomuumbugantu woshilongo, koBethanie noGochas. “Ondi shishi nawa kutya itamu vulu okumbilipaleka omuntu kehe uuna tashi ya koshimaliwa, kakele esindano lyomapendulopo gaHelao Nafidi oli ikwatelela keuvoko ewanawa pokati kaakalimo nelelo ndyoka lya hogololwa,” Negonga ta ti. Kombinga yuupomba womeya mboka wa patwa kelelo lyondoolopa omolwoongunga dhomeya inaga futwa, Negonga okwa ti shika okwa li sha kundathanwa muule nokuziminwa kutya uupomba womeya wu patululwe omanga oonkundathana dhilwe tadhi tsikilwa nadho. Ota ti omeya ogo omwenyo onkee inashi pumbiwa kutya nee opamukalo guni aantu ya tindilwe omeya omanga pwa li ompito ombwanawa okuyelithila aakwashigwana nawa nokukundathana nayo omikundu dhoka dhi li po. Omanga nee uupomba womeya tau patululwa, omalongekidho oge na okutulwa po okukonga omikalo dhilwe dhegandjo lyomeya kaakalimo kondando yontumba. Yimwe yomoonkatu dhoka okutula po omukalo guupomba womeya hagu longo nuukalata nenge okufuta tango manga ino teka omeya kokapomba. Ookansela nOmunambelewa Omukuluntu gOndoolopa Helao Nafidi, Chris Shivolo, Omunashipundi gwElelo lyOpamuthigululwakalo lyUukwanyama George Nelulu, aapolisi naNgoloneya nokuli Kansela goshitopolwa shaHangwena, Usko Nghaamwa oya kala poshigongi shoka. Negonga ngoka kwa li a tumwa kuMinista John Pandeni a ka gandje eyamukulo kaakwshigwana peha lye, okwa ende pamwe nOmukuluntuwiliki e nasha nOmalelo gOpaendoolopa nOmithigululwakalo, Lameek Uyepa. Konima yomutumba noshigwana, aanambelewa mbaka yaali oya ka tula omakaya kombiga nElelo lyUukwanyama lyOpamuthigululwakalo shi nasha niinima ya pamba uumwene womavi ngoka ge li moongamba dhondoolopa, ihe natango oge li miikaha yelelo lyopamuthigululwakalo ano mekondololo lyomalenga nookapatashu.