ONGWEDIVA – Ovakalimo vomoshikandjohoololo Uuvudhiya moshitukulwa shaShana ova topolwa kumwe komufekelwa wondudu oo a eta edundakano moshitopolwa.
Ovakalimo vomOmapopo, Alusati, Iipopo yaAngolo, Oshaanda shAmutenya osho yo Omusati gwaNiita ova kala tave lihokolololifa nokukala vehe na ombili molwomufekelwa wondudu. Eshi osha etwa molwomatengeneko a dja komufekelwa kutya pomukunda ove li po tave li loo.
Omupopiliko wopolifi moshitukulwa shaShana Thomas Aiyambo okwa tumbula kutya omufekelwa okwa eta etopoko nokuteya elongelokumwe momukunda. Okwa twikila yoo kutya omufekelwa omulumenhu a dja komukunda Tsumkwe vati ha pange ovanhu pamufyuululwakalo. Aiyambo okwa twikila ko kutya ovanhu vomomukunda eshi ve mu mona ova tameka okukala hava ka pangwa komufekelwa wondudu, nomanyamukulo aa hava mono ko alushe ohaa eta outondwe nomalwoodi pokati kovanhu momukunda. “Onghalo ei oya kala tai nyemateke kovanamukunda shaashi alushe ohava kala ashike va hala okulidenga,” Aiyambo ta weda po.
Okwa twikila ko yoo kutya ope na oshiningwanima shimwe omufekelwa a lombwela okakadona kamwe kopomukunda kutya otaka liwa komukulupe wopomukunda. Omukulupe vati okwe mu tula omayoka opamhepo momutwe. “Omukulupe eshi a uda onghundana ei okwa li monghalo ii, ye mu twala fiyo omoshipangelo,” Aiyambo ta ti.
Okwa twikila ko yoo kutya ovanamukunda ngeenge tava pangwa komufekelwa ohava futifwa oimaliwa ile eengobe. Okwa kunghilila ovanamukunda va xulife po okupwilikina keendudu doipupulu oshoyo ovafita.