Oshali sha pula ethimbo opo Chief Inspector Christine van Dumen Dafonsech a ihololele onganga kutya oye lye, sho kwa li a lundulula omuzalo newi lye, noku ya ponganga a fa ta kongo uuhaku.
Dafonsech shoka okwa li e shi ningi nelalakano okumona uuyelele wa gwana nkene onganga ndjoka ya kala nokuyuga oshigwana okupitila mokupanga, mondoolopa yEenhana moshitopolwa shaHangwena. Onganga yedhina Coster Wirosi, Omuzimbabwe ngoka a li ta longo nasuala gwe, omulukandhi gwamumwayina Saara Uushona-Muzo okwa li ya mangwa po esiku ndyoka.
Uushona-Muzo oye anuwa mwene gwehala mpoka hapu yakulilwa aantu. Omusamane gwe ngoka oye omukuluntu moshipangelo shawo shedhina Dr. Sibandas, anuwa oku li koZimbabwe. Osha li she ya halukitha sho Dafonsech i iholola oshoka okwa li ye li metifa oku mu pa uuhaku.
“Oshike mu na okuyuga oshigwana iimaliwa yasho, tamu shi fundju noku shi pa omiti dhiifundja?” ta nyenyeta.
Ta ti, iinima ayihe ya li ye mu lombwele kayi shi yoshili. Shoka tashi holola kutya otaya panga iifundja.
Dafonsech okwa li a pula omulumentu ngoka kutya ngele ota longo moshili oshike inaa mona kutya yo inaya endela okuyakulwa shili. “Aantu mbaka oyo taya piyaganeke oshigwana moshilongo shetu, yo taya ka shuna kiilongo yawo ye tu teyagula po,” ta kumagidha ngaaka.
Otaku hokololwa kutya oonganga ndhoka odha kala po ule womimvo dha pita pomulongo, nodhi shiwike nawa unene miitopolwa yokonooli.
Onganga ndjoka yomulumentu sho kwa li ya pulwa kutya oyi shishi ngaa kutya otayi kengelele nokuyuga oshigwana oshimaliwa, okwa li ya zimine. Pehala lyawo mpoka kwa li taya yakulile okwa li pwa adhika omatiti gu udha iinima mbyoka haya yakulitha.
Opolisi moshitopolwa shaHangwena esiku ndjoka oya li ya popi kutya, oonganga ndhoka odha popiwa mo nale moshitopolwa moka. “Otwa li twa yakelwa ko kutya oonganga ndhoka ohadhi kala po mbali, thimbo limwe oto adha iihauto yaantu ya thika sigo okopate, taya yakulwa,” tayi ti ngaaka. Ethimbo ndyoka, opwa li pweya omulumentu a eta po oshimaliwa shoka taku fekelwa kutya oshofuto sho kwa li a yakulwa.
Omulumentu ngoka gwonganga okwa li a mangwa po sho inaa adhika nuuthemba washa oshowo oombapila dhepitikilo okulonga iilonga ya tya ngaaka moNamibia.