Omukulunhu wongeleka yedina Evangelical Angelican Church of Namibia “Reach” Lukas Katenda okwa ti ovakalimo komukunda Onamukalo no nande va hanya epatululo longeleka momukunda wavo, yee okuna ashike okuipatulula muMaalisa neudo.

Katenda edi okwe di popya pefimbo leenghundafana davo naKundana onghela, kombinga yoshikumungu shovakalimo vo momukunda Onamukalo moshitukulwa shaHangwena, ina va hala eongalo lo Reach vati li patulule oshitayi momukunda wavo. 

Oshitayi ngeleka eshi otashi lelwa komubishofi omupedu wongeleka yoReach Nelson Ndakevendjo.

Ashike mwene womukunda Onamukalo Justina Hamukoto vati okwa yandja enyakulo kuKatenda, nosheendo shaye kutya momukunda kamuna onhele yokuninga ongeleka yavo.

Novanhu vopomukunda vati ina va hala ongeleka ei.

Edi oda shangwa momukanda wa li shangwa mo 30 Desemba 2025.

Katenda okwa ti enyamukulo eli oleya konima eshi a ninga eindilo opo audifile ovakalimo vaNamukalo omambo ngeno mu 4 Januali 2026.

“Ndakevendjo odalele yaNamukalo. Omo hadi, yee neshe laye omo li li. Kandi wete oudjuu washa, kovanhu ina ve mu hala shaashi yee oteya ashike okuudifila, okukwafa ava vpumbwa ekwafo lopamhepo. Kandishishi kutya eshi shili momitwe dovakwashiwana oshike,” Katenda ta ti.

Okwa twikila kutya yee kOnamukalo oko heya shito okuninga omambo, pokati keedula 2020 fiyo 2021, okwa shasha ovanhu nokuna ovakwaneongalo vaye ava hava di momukunda omo.

“Mu 1 Maalisa 2025, otuna okupatulula oshitayi shongeleka yetu pambelwa, nOvanamukalo nava shivifilwe kutya oko haidi oko. Ita ndiya nda homata omakamba ile olwoodi, oha ndiya ndi yadi ombili, yoo tai pula elongelokumwe, ashike ongeleka oina okupatululwa momukunda va hala ina va hala,” ta yelifa.

Okwa weda po ta ti kutya Namibia ola manguluka, nola mangulukila aveshe. Onghee ka pena omunhu e na oufemba woku a nyena ovanhu edu opo lili.

“Koomwene womukunda hako va li handi ka pitila, paife oha ndi kadilila keembonge da kula,”’ta weda po.

taimihaihambo2000@gmail.com