Omukainhu weedula 38 a dile kOpuwo moshitukulwa shaKunene okwe uya modoolopa yaEenhana opo a landife omaludi oihemba noshoyo okukala a xwaxwameka oshiwana shi kale shi na ohokwe yokulongifa omiti doihemba.
Kandu Tjavara okwa kunghilila oshiwana opo shi fimaneke omufyuululwakalo mokukala tashi longifa omiti doihemba shaashi oya fimana eshi hai pange omikifi da yooloka. Okwa hokolola ta ti paife okwa ninga mo omafiku atatu mEenhana ta landifa ashike oku na omukumo shaashi oshiwana otashi holoka momwaalu muhapu okulanda omiti doihemba noshoyo okukala sha pula ouyelele kutya omiti doihemba ohadi longo ngeipi.
“Ohandi yandje ouyelele nehongo kovalandi ngeenge tava pula kutya oihemba ohai pange omikifi dilipipo noshoyo nghee ve na okulongifa oihemba,” Tjavara ta ti.
Tjivara okwa lombwela Kundana ta ti elalakano opo e uya kEenhana osheshi kodoolopa yaPuwo kaku na sha ovalandi vahapu shaashi ove hadiko hava landifa omaludi oihemba.
“Onda li nda lombwelwa kukahewa kange umwe ha longele modoolopa yaPuwo kutya koshitukulwa shaHangwena oku na ovanhu vahapu hava kala tava pula okulanda oihemba. Onghee naashi osha eta opo ndi kale nde uya ndi ninge omangeshefelo mEenhana,” Tjavara ta ti. Okwa yelifa ta ti oihemba ohai dulu okupanga omikifi ngaashi ohonde ya londa, omukolo, eshikisha, omukifi wexuli, oudu womukota noshoyo omikifi dikwao da yooloka. Tjavara okwa ti oku na ounona vaheyali hava xupu moshimaliwa osho a mono ngeenge a landifa oihemba. “Omushamane wange ke na oyuuyemo yasha. Atushe ohatu xupu ashike mokulandifa oihemba,” ta ti.
Okwa weda po ta ti oihemba oye va kwafela unene mokupanga ombuto yoCovid-19 eshi va kale ashike have li twimikile ngeenge ve na eshikisha ile omukolo.
“Fyee ngeenge twa kwatwa koshidu ihatu i koipangelo shaashi otwa fimaneka omufyuululwakalo wetu, onghee ohatu longifa oihemba opo tu dule okulipanga momaumbo etu,” Tjavara ta ti.
Okwa kunghilila oshiwana opo shi kale tashi landifa oinima yopamufyuululwakalo wa sho opo shi kale ke po efimano lomifyuululwakalo davo noshoyo okukala she li monena oyuuyemo ngeenge tashi landifa.
“Ovakulunhu na kale tava longo ounona wavo kombinga yefimano lomufyuululwakalo unene tuu oinima ei hai dulu okulongifwa ngaashi oihemba nosho tuu,” ta ti.
Eshi Kundana a kwatafana nomukainhu umwe ou kwa li e uya okulanda oihemba kuTjavara, okwa hokolola ta ti okwa kala alushe tava pula okulanda oihemba yokukala tava longifwa ngeenge va kwatwa koshidu.
“Ame ondi hole okulongifa omiti doihemba shaashi ohadi kwa fele nge ngeenge da kwatwa koudu womukota,” ta hokolola.
fhmalwa@nepc.com.na