ONGWEDIVA – Efimbo eli olomauni novalandifi vahapu otava hokolola nehafo nokupandula molwaashi paife ohava mono oyuuyemo tai di momauni.
Omauni oha tameke okulikolwa momwedi Aguste fiyo Novemba unene moshikandjohoololo shaKongo noshoyo koitukulwa ivali yaKavango.
Ovanhu ohava landifa eeshako domauni kuvakwao opo va dule navo okukalandifa keenhele da yooloka ngaashi komaushimba, nokoitukulwa imwe yoshilongo oko ihaku monika omauni.
Pefimbo Kundana a ninga eenghundafana novalandifi vomauni va yooloka momatala aKongo, Omuthiya noshoyo momatala aShakati ova hokolola tava ti neudo oku na omauni mahapu mokufafanifa nomudo wa dja ko.
Ova hokolola tava ti omauni oha landwa edulife eembe neenyandi molwashi ovanhu ove hole okulanda eeshako domauni opo va dule navo okukaninga eengeshefa davo.
Lusia Twindileni omukalimo womOkongo hala ndifa omauni okwa hokolola ta ti ongeshefa yaye yomauni oya lundulula onghalamwenyo yaye molwashi paife oha dulu okuyambidida ounona vaye noshoyo okulanda oikulya.
“Pefimbo omauni kwa li ina mapya ohandi kala alushe ndihe na oshimaliwa shokulanda oikulya neefewa meumbo ashike paife ohandi dulu okulandifa nande oshimaliwa N$500 mefiku,” Twindileni ta ti.
Twindile oha ka toola omauni momufitu nokulandifa eeshako noshoyo okulandifa koolimwe.
Agnes Kamati weedula 27 oha landifa omauni momatala mOmuthiya nokwa hokolola ta ti oha landifa omauni molwashi kena sha oilonga.
“Ondjala noluhepo oya eta opo ndi landife omauni. Onghee elalakano oku li monena oshimaliwa shomondjato noshoyo okuyambidida ounona vange,” Kamati ta ti.
Okwa ti oha lande eeshako domauni koKavango nokulandifa mOmuthiya.
Kamati okwa ti omauni okuholike okuliwa kovanhu unene kovakulunhu hava di meedoolopa.
Lopokati opo Kundana okwa ninga yoo vali eenghundafana naRosalia Kamona hala ndifa omauni womatala modoolopa yaShakati, nokwa hokolola ta ti okwa dja koRundu opo e uye a landife omauni mOshakati molwashi omauni okwa pumba mo.
“Ohandi landifa eeshako domauni kovanhu ve ne ehalo lokukaninga eengeshefa davo. Oshako imwe oina eeN$100 omanga euni limwe oli na eeN$2. Onghee ongeshefa otai ende nawa mOshakati,” ta ti.
Okwa ti okwa taalela eshongo lookalyamupombo va hanya momatala Ashakati alushe hava kala va hala okuvaka po oilandifomwa yavo.