OHANGWENA – Osikola yopaungomba, Ongha VTC ndjoka yi na iimpungu yiilongwa ya yooloka, oya gwedha ko oshilongwa shuunamapya, shoka sha eta omalunduluko nomomudhingoloko.
Osikola ndjoka yi li mondoolopa yaHelao Nafidi, oyi li mekwatelokomeho lyomukokoli gwosikola Ismael Hamunyela.
“Osikola ndjika oya eta elunduluko moshitopolwa shetu poompito odhindji,” ta popi ngaaka.
Ta ti, posikola yawo ohaya tambula aalongwa nando kaye na oonzapo dhoondondo dhahugunina, nelalakano lyokuyambidhidha aanyasha ya mone oompito dhomayithano gawo.
Ta popi ta ti, oshikunino shoka oshe ya po okupitila moshilongwa shuunamapya otashi yambidhidha aanangeshefa aashona oshowo oshigwana momudhingoloko.
Omulongi gwoshilongwa shuunamapya posikola mpoka Tuyenikelao Hamunyela, okwa fatulula kutya oshikunino otashi ende nawa, nosha tulwa ponkatu mpoka shi li nena kaalongwa oshowo komukwatelikomeho goshikunino ngoka e na ontseyo nokwa pyokoka nawa moshimpungu shuunamapya.
Omukwatelikomeho gwoshikunino Tulihongenii Shikomba okwa li a enditha omutoolinkundana nguka moshikunino shoka shi na iikwamboga ya yooloka, ngaashi oonyanga, omatama, oondungu, oomboga niikwawo oyindji.
“Oondando dhetu ohadhi hili aashingithi yomomapandaanda oshowo aakwashigwana. Ohatu pula ashike oshimaliwa ngele oshindji N$10, oshoka iikwamboga otse hatu yi kunu tse yene,” ta popi ngaaka.
Ta ti, oyendji yopomudhingoloko gwawo, oya ikolelela moshikunino shosikola.
Ta gwedha ko ta ti, yamwe oya fatulula wo kutya, ohaya landa mosikola oshoka iikwamboga yawo ihayi gwedhwa iinima oyindji, ihe ohayi kunwa ashike pamulandu.
“Nonando oshikunino shetu otashi tu nyanyudha ngeyika, otwa taalela uupyakadhi woombundhi. Ope na aantu haya londo ondhalate uusiku, taye ya okuyaka mo iikwamboga yetu,” ta popi ngaaka.
Maria Sheetweni, omulandithi gomomapandaanda momundhingoloko gwoHelao Nafidi okwa ti, oshikunino shosikola otashi ya yambidhidha noonkondo oshoka ondando otayi etitha oonkondo lela.
“Okwa li hatu longitha oshimaliwa oshindji okuteka iilandithomwa yetu okuza koositola, ihe paife ovenisa tatu mono paife ombwaanawa lela,” ta popi ngaaka.
Omupevipilima minista, Netumbo Nandi-Ndaitwah oomwedhi dha zi ko, sho a li a talele po osikola yoshiputudhilo shopombanda Ogongo Unam, okwa li a popi ta ti, uunamapya owo onakuyiwa oshoka ihau felefala.
‘’Sigo esiku lyetu lyahugunina, out na okulya. Iikulya oyindji ohayi zi muunafaalama ngaashi iikwamboga nosho tuu,’’ ta popi ngaaka.
Ta kumagidha aanyasha ta ti naya longithe oompito taya mono okukutha ombinga muunafaalama, oshoka oshindji otashi holoka, shoka tashi ka lundulula onkalo yoshilongo shika.
Okwa li wo a kwashilipaleke kutya oopelesenta 80% dhiikulya ohayi etwa po okupitila maanafaalama aashona.
Ta ti okwa ndhindhilikwa wo kutya aanafaalama oyendji taya dhana onkandangala aakiintu, sho shoka uutekinolohi mongaashingeyi tau longithwa opo aakiintu ya ningilwe iilonga iipu.
vkaapanda@nepc.com.na