Ovanhu vahapu monooli yoshilongo natango onghene nghaho vehe na omaufemba woshilongo, oshinima osho hashi imbi opo va mone omayakulo haa pewa ovakwashiwana vakwao, unene meembelewa.
Ovanhu veli komikunda dokoushai ovo unene va didilikwa ve na omukunda woku hena omaufemba woshilongo shaashi ove li kokule neembelewa doikwameni.
Kansela woshikandjohoololo shaGongo Daniel Iilende okwa lombwela Kundana ta ti ombelewa yaye oya didilika moshikandjohoololo shaye muna omwaalu muhapu wovanhu vehe na omaufemba.
Ilende okwa ti ovakulupe vamwe ihava kwata oshimaliwa shopendjela shaashi veha na omaufemba noshoyo ovanafikola vamwe ihava mono omayakulo keembelewa molwashi vehe na omaufemba.
Onghee okwa ti eshi oshili eshongo linene lataalelwa kovakwashiwana shaashi vehe na omaufemba.
Kansela woshikandjohoololo shaMundaungilo Festus Ikanda naye okwa hokolola ta ti omhumbwe yokuhe na omaufemba oya kuma ovakwashiwana moshikandjohoololo shaye unene tuu oshiwana shovayelele.
Ikanda okwa ti oshivike sha djako moshikandjohoololo shaye okwa li muna oshikonga shokuyandja omaufemba komikunda dimwe po ashike natango omuna omikunda dihapu muna ovanhu va pumbwa omaufemba.
“Oovene vomikunda nava kale tava shange omadina ovanhu ovo vehe na omaufemba momikunda davo ndele tava tumu omadina kombelewa yange,” Ikanda ta ti.
Ikanda okwa ti elalakano lokushanga omadina opo ombelewa yaye i kale ya ninga omalongekindo nombelewa yokuyandja omaufemba i dule okukala ye uya okuyandja omaufemba kovanhu vena omadina a shangwa.
Eshi a kwatwafana naKundana omupeduminista wouministeli woikwameni neameno lokeengamba Daniel Kashikola okwa ti ombelewa yaye oya didilika omhumbwe yokuhe na omaufemba tai dana onghandangala moshiwana unene tuu moitukulwa yokonooli.
Okwa ti ombelewa yaye oya tameka omudo wa djako nokuninga oikonga yokuyandja omaufemba nouyelele koshiwana momikunda ngaashi moshitukulwa shaHangwena nOmusati.
“Neudo otuna okutwikile noikonga yokuyandja omaufemba koshiwana osheshi osha fimana ngeenge omunhu e na oufemba opo a dule okumona omayakulo opashiwana,” Kashikola ta ti.
Okwa weda po ta ti oshitukulwa shaKunene osho shimwe tashi ka tamekwa noshikonga yokuyandja omaufemba shaashi okwa didilikwa kuna ovakwashiwana vahapu vehe na omaufemba.
“Ookansela nava kale tava lopotela eembelewa detu doikwameni neameno lokeengamba ngeenge va pumbwa ovanambelewa ve uye va yandje omaufemba koshiwana moikandjohoololo yavo,” ta ti.