Auleria Wakudumo
Omufitaongalo nomukulukadi waye ova tulwa vati moipandeko eshi va kendabala okushangifa okaana odjapo yedalo komaulikilo oipindi kOngwediva moshitukulwa shaShana Etitano. Omufekelwa omukulukadi weedula 24, okwa mangwa po efiku loshiningwanima, okwa holoka momhangu nokwa anyenwa omhito yokulifutila mo modolongo.
Omanga omufekelwa omulumenhu omufitaongalo weedula 39, weongalo Omwene Tumenge momukunda Oshuuli, okwa ya moipandeko momafiku 26 Auguste 2024 nokwa teelelwa a holoke momhangu yamangestrata waShakati mo29 Auguste 2024.
Oshiningwanima osha ningwa lwopo 20h30 pokastand kouMinisteli woikwameni neameno lokeengaba, momaulikilo oipindi aNgwediva.
Omupopiliko wopolifi moshitukulwa shaShana, Inspekta Frieda Shikole oye a koleka oshiningwanima eshi.
Shikole okwa ti omukulukadi oye a ka shangifa a tule mo eindilo lodjapo yedalo yokaana pokatala kouministeli woikwameni nokwa yandja vati okakalata keshasho, nombaapila ya dja kumwene womukunda tai koleke kutya omukulukadi oye ina yokaana.
Ovanambelewa ova ka limbililwa kutya omolwashike okaana kehe na odjapo yedalo omanga ouministeli u na eeprograma domashango eedjapo domadalo da indjikana unene momikunda.
Shikole okwa ti ovanambelewa ova pula vati omukulukadi kombinga yovafikameni vokaana nomukulukadi ina dula okunyamukula epulo. Ovanambelewa vati ova twikila okupula okaana kombinga yovakulunhu vako, nokaana okashiivifila ovanambelewa kutya ina oku li kOndjiva, moAngola.
Shikole okwa weda po kutya ovanambelewa ova twikila nokupula vati omukulukadi kutya xe yokaana oku li peni nokwa holola kutya oku li naye e va teelela pondje. Konima, aveshe ova pulwa naxe yokaana okwa ti kutya okaana okaye, ashike ina yokaana haye oo e li naye.
Ovafekelwa ova li nokaana kamwe vali oko vati kutya oka dalwa komumwainakadona womusamane. Ashike konima eshi va twalwa kopolifi, omusamane okwa ti kutya okaana okomumwainamati.
Ounona vavali ova tengenekwa ve li pokati keedula 6 na7.