Ongwediva- mbunga zakara asi zokudika mambo zaNHE kuna tulisapo ukumwe nomagendeso gonodoropa dakara komuzogo, Ondangwa, Oshakati ntani Ongwediva omu vana kutara mukaro ogu guna kukura udigu womambo ntani kuwapukurura mavango vatura paveta asi gokutunga.
Kunyatera elizuvho lyangesi, kalikereko moutano, omu yina kara asi simwe sina kara souhunga omu navaruganena kumwe vagave mambo gomawa ntani gombiliha ntani kuwapukurura maparu govatungimo unene vakara monodoropa.
Ndango zodoropa zaOndangwa munamberewa kurona gwawo Ismael Namugongo katente asi elikwamo eli lyokuruganena kumwe nare lyakarapo. Age kayibubwire asi vantu wokusika ko 7000 kuna kara pelikwamo lyendindiro vagwane mambo sinzi sawo kwatunga koruha vatura paveta rokudika mambo ndi rokutunga. ‘’ Ose kapi tatuvhuru kugusapo udigu wombo nyoselike. Eruganeno kumwe lina kara ngwendi lyeli kumwe noNHE lina kara mulyo unene mokutara asi ngapi natugusapo udigu womambo. Age kayinkondopekere asi vantu kuna hara mambo morwa kuna kara nye asi nompito dina karapo omu vana kuwiza wovanzi kodoropa zaOndangwa. Elizuvho kuna kara asi lyomambo gompiliha ndi gava avagwana nzambi zosesu. Munasipundi gombungha zaNHE Toska Sem katarwirwire mukaro ogu tuna kara nago kuhamena mambo, elikwamo lyangesi nare lyatameka moSwakopmund. Otjiwarongo nare vatameka kuyilikida eyi nokukara noyitundwamo yoyiwa. Ose tuna hafa mokukara asi tatuturapo malikwamo gomalizuvho kumwe naOndangwa town council. Udigu wetu womambo twahepa kuugusapo kupitira meruganeno kumwe moyitura eyi mosirugana tuwapukurure noprojeka detu momavango aga vatura asi gokutunga ,’’ yimo ana kutanta Sem.
Mukurona godoropa zaOshakati Leonard Hango katente omu ndango zina lituramo asi vantu vahepa kugwana mambo gomawa.
Age katente asi elizuvho eli lyahepa kutulisapo ngendeseso zongwa omu natiuwapukurura mavango gokutunga vantu. ‘’ Mokuruganena kumwe twahepa kutulisapo ntanteko kovantu vetu omu navagwana mavango navatumbura asi mambo gawo. Elizuvho eli kuna kara patjangwa.
Yina kara asi etumbwidiro kovantu vetu ,’’ yimo ngoso ana kuhuyunga.
Ongwediva nawo kavazire momalizuvho gangesi kumwe noNHE, ezuva limwe tupu. Omu vana kutwara nye eruganeno kumwe momukunda omu vana hara kuwapukurura ukaro wombo. Mokupitira nye melizuvho eli, omu vana kundindira asi kansela vatulisepo noprojeka kapisi dokiugusapo tupu udigu wombo nye vahepa kutulisapo hena yirugana yipo asi vawapukurure ekonomi momukunda melikwamo lyongoso.
-vkaapanda@nepc.com.na