Victoria Kaapanda
Elelo lyondoolopa yaNgwediva olya gongela oshimaliwa shi vule pomilliona esiku lyohungi ndjoka ya ningwa mehuliloshiwike.
Ohungi ndjoka okwa li ya ningilwa okugongela oshimaliwa okuyambindhindha oshiindingili oshinene, shoka hashi ningwa omumvo kehe nonando omimvo mbali dha piti ka kwa li sha ningwa, tashi ithanwa Ongwediva Annual Trade Fair.
Ongwediva Annual Trade Fair, omauliko giipindi ngoka haga gongaleke aalandithi yiilandithomwa ya yooloka oshowo omauliko guunongo no mahangano ga yooloka.
Omunambelewapithi omukuluntu Jackson Muma okwa ti, omahangano ga yolooka okwa li ga uvaneke okugandja iimaliwa okuyambindhindha omauliko giipindi ngoka taga ka tameka momasiku 26 gaAguste sigo 01 lyaSepetemba.
“Ehangano lyokukwatakanitha omawi gopangondhi (MTC), olya li lya uvaneke okugandja oshimaliwa N$550 000, omanga ombaanga onene yopashigwana FNB oya uvaneke okuyambindhindha noshimalwa N$200 000 nomahangano galwe oga yambindhindha noshimaliwa sha thika N$20 000, kumwe” ta ti ngaaka.
Muma ta ti, oshimaliwa shoka ashihe osha thiki poomilliona N$1.1, no tashi kalongithwa okuyambindhindha okulongekidha oomauliko giipindi ngoka.
“Ohashi pula oshimaliwa oshindji okulongekidha omahala ga longekidhwa nawa, gaalandithi, oshowo iikwawo oyindji okugandja omayakulo mo trade fair’’ ta popi ngaaka.
Ngoka a kalele po ehangano lyoMTC John Ekongo okwa ti, oongeshefa ndhoka dha hupu oshowo ndhoka dhi li po, otadhi ithanwa okukondjela noku humitha komeho eliko.
“Okukondjela noku yambula po eliko, okuna ashike etompelo limwe ndyoka lyoku hwepopaleka onkalo yoshigwana,” ta ti ngaaka.
Ta ti, omahangano omanene noongeshefa odha pumbwa okushininga onkalo ndjiigilile okukundathana nkene yena okuyambula po noku humitha komeko eliko miitopolwa ayihe moshilongo.
“Okupitila momukalo ngoka, oompito dhiilonga otandhi ka holoka, okukandula po omaupyakandhi gataalela oshigwana,” ta ti ngaaka.
Omunambelewa omukuluntu gwombaanga onene Development Bank of Namibia Martin Inkumbi okwa ti, aanangeshefa aashona oyo omeho gonkalamwenyo yoshilongo monakuyiwa onkene Namibia olya pumbwa aanyaha mboka. – vkaapanda@nepc.com.na