Auleria Wakudumo 

Minista weedoolopa nomayambulepo okomikunda Erastus Uutoni okwa patulula pambelewa omapandaanda mOngwediva mEtitatu, oo a lukilwa oohandimwe ovo va kala nokuyambidida elelo lodoolopa nova dana onghadangala meenghalamwenyo dovakwashiwana vomodoolopa yelelo laNgwediva osho yo Ovanamibia koonono. 

“Ohandi pandula elelo lodoolopa yaNgwediva eshi la lukila ovakalimo vaNgwediva ovo va kala nokukwafela nova dana onghadangala mexumokomesho lodoolopa okudja manga Ongwediva inai ninga nokuli odoolopa fiyo opaife,” Uutoni ta ti.

Mayola wodoolopa yaNgwediva Taarah Shalyefu okwa ti elukilo lovakwashiwana vaNgwediva oli li shimwe shomeemhangela delelo lodoolopa mokukwashilipaleka kutya otava yandje omayakulo ongushu kovakalimo vavo. 

“Otashi holola yoo efimaneko, edimbuluko opo tu shiive okuhangana ongOvangwediva modoolopa yetu,” Shalyefu ta ti. 

Vamwe va lukilwa omapandaanda ongaashi Moses Hamutumua, Fatius Haushiku, Denys Nandi, Helena Shuuladu navakwao. 

Ovo va lukilwa omapandaanda ova holola etumba mokulukilwa, ovati etokolo lelelo ota li kwatele po ondjokonona yodoolopa fiyo okomapupi ta eya. 

Ova holola yoo kutya elukilo leenhele ngaashi omapandaanda nali kale olushe tali holola odjokonona yodoolopa ponhele yokulukila nande oimuna ile oinima ikwao oyo itai ulike ondjokonona yodoolopa. 

Eluko lomapandaanda ola fimana opo omukwashiwana keshe a kale eshi apa e li, apa a dja osho yo okuyandja omapukululo eenhele, okumona onhele yonhumba osho yo okupukulula ovayandji vomayakulo. 

-wakudumoauleria@gmail.com