Uuninisteli womidhingoloko iihwa nomatalelepo owa pititha kutya owa dhipaga onkoshi ndyoka yaningi ethimbo nuule tayi piyaganeke oshigwa yo tayi li po iimuna yaantu momudhingoloko gwaSesfontein oshowo koPuros.
Omugandji gomauyelele muuministeli gwomindhingoloko Romeo Muyunda okwa ti, onkoshi ndyoka okwa li ya tameke okupiyaganeka momidhingoloko moka okuza 2019.
“Oya kala tayi hanagula po omalukalwa gaantu noya ndhindhilikwa ya lya iimuna ayihe kumwe 34, mbyoka ya kwatela mo oondhombe dhili 12, oondongi 13 oshowo iikombo omugoyi,” ta popi ngaaka.
Ta gwedha po ta ti, onkoshi ndyoka otayi tengenekwa yina oomvula hetatu nenge omugoyi, no ya li ya dhipagwa sha ikolelela kokatendo taka popi shoka shina okuningwa uuna pena uupyakandhi tauetwa kiiyamakuti. ‘’Onkoshi ndyoka oya kala oshiponga mokati kaantu, sho yakala noku ponokela omahala gaantu, no kwa li ya holola kutya otayi vulu okufaalela oomwenyo dhaantu,” ta fatulula ngaaka.
Muyunda okwa ti, etokolo ndyoka okwa li lyaningwa okugamena oonkalamwenyo dhaantu momudhingoloko moka oshowo iimuna. “Okwa li kwa kambadhalwa onkoshi ndyoka yi lundulululwe komahala galwe kokule naantu, ihe natango okwa li ya tsikile okuholola uuhwapindi. Shoka ka kwa li tashi tsu kumwe noompango dhuuministeli,” ta yelitha ngaaka.
Ta popi kutya aakalimo yomomudhingoloko gwaSesfontein oshowo omahala ge li pomidhingoloko dho popepi, oya kala nokuindila uuministeli wu ninge po sha, okukandula po uupyakadhi mboka omanga onkoshi inaayi ya monitha oshiponga.
“Omayinyengo gonkoshi ndyoka okwa li ga dhidhilikwa oshoka okwa li yatulwa okashina ko kuyi kondolola, onkene ehokololo lyonkoshi ndyoka olyishiwike nawa,” ta fatulula ngaaka.
Muyanda natango okwa li a gwedha po kutya, oshinakugwanithwa shuuministeli womidhingoloko okukandula po omaupyakadhi goludhi ndoka.
vkaapanda@nepc.com.na