Shiyenga shaNangombe ngoka a li a ningi ethimbo a tula mo okafudho hoka ka li ka limbililike aanamapya naaniimuna, okwa tengenekwa e ke ga dhenge pevi mehuliloshiwike miitopolwa yokonooli.
Sha ikolela kehangano hali ungaunga nonkalo yombepo moshilongo, omvula oya tegelelwa yi kaloke nawa mehuliloshiwike miitopolwa ya yooloka yokonooli.
Olya pititha wo kutya, nonando iitopolwa yokonooli oya li ya mono omata omashona okuza petameko lyoshiwike shika, omvula ndjoka onene otayi landula ko.
Ehangano lyonkalo yombepo olya pititha kutya Oshakati, Okahao oshowo Oshikango, okwa yalulwa omata ge thike poo5,8mm, 1,4mm oshowo 0,4mm okuza Omaandaha sigo ongula yEtiyali lyoshiwike shika.”‘Iitopolwa yokonooli, Rundu oshowo oWindhoek otayi ka mona omuloka omwaanawa mehuliloshiwike ndika,” osho lya totha mo ngaaka.
Omvula oya loko ya dhiginina okuza petameko lyoshiwike shika moWindhoek.
Okwa ndhindhilikwa omudhingoloko gwOlympia gwa mono omuloka omunene unene, nomata ge thike 60mm.
“Oshitopolwa shOtjzondjupa oshowo Hardap oya mono omuloka gu thike 1.6mm oshowo 3.8mm pokati kOmaandaha nEtiyali,” ehangano lyonkalo yombepo lya ti ngaaka.
Komalungula okwa taambathanwa uuvidio oshowo omathano gomvula sho ya loko moshilandopangelo.
Otaku monika iihauto tayi hingi nuudhigu okupita moondjila dhi na omeya omanga yimwe tayi hala okuningina kohi yomeya.
Aanafalama yiimuna oya kala ye na eikwatopomutima kutya nuumvo iimuna yawo otayi si po kondjala omolwompunbwe gomwiidhi.
Shitumbe Johannes gwomomukunda Okando okwa ti, ngele omvula otayi ya shili, oshinima oshiwanawa.
“Oomwenyo dhetu odha ikolelela miimuna moka, ngele oya si po natse oye tu faalela,’’ ta popi neyeme.
Ta ti, otaya tsikile okutala kegulu ngele taku zi omata.
Aanafaalama yomomapya mboka nayo ya kala ye na uutile kutya iilya yawo otayi kukuta, otaya ti ngele onkundana ndjoka oyoshili, otaya pandula.
“Ashike ngele omvula inayi loka momasiku twa taalela, kayi na sho tayi ka pondola, oshoka iilya oyindji oyi li nale pokukukuta,’’ Maria Immanuel gwomomukunda Omeege ta ti ngaaka.
Ta ti, omvula oya kala ko, onkene ayihe oye yi gandja miikaha yaPamba, oshoka natango otashi vulika yi kale inaayi loka ngaashi tashi kundanekwa.
vkaapanda@nepc.com.na