WINDHOEK
Ontotwaveta ompe ndjoka ya thanekwa okufutila iihakanwa ayihe yiiponga yomoondjila kutya nee oMotor Vehicle Accident Fund (MVA) oye shi mona mo kutya oshiponga osha etwa koondalayiva, otayi konakonwa neitulomo enene kepangelo pethimbo ndika.
Shika osha tseyithwa kOmupehaminista gwIimaliwa, Tjekero Tweya poshigongiilonga shomasiku 10 sha ningilwa aapolisikonakoni ye li 25 okuza miitopolwa ayihe 13 moshilongo mboka ya li pomadheulo gawo poPatrick Iyambo Police Training College mOvenduka oshiwike sha zi ko.
“Ontotwaveta otayi lalakanene okugandja omauwanawa kiihakanwa ayihe yiiponga moopate dhetu, mboka haya thigwa nomitima dha tekauka.
Ontotwaveta otayi ka gandja wo omauwanawa gayooloka kiihakanwa mbyoka ya etitha iiponga.
“Shika otashi ti aafaalelwa naahingi mboka inaya simaneka oompango dhomoondjila itaya ka mona omauwanawa gi ihwapo okuza moshiketha shoMVA,” Tweya ta londodha.
“Eindjipalo lyiiponga yomoondjila moopate dhetu dhomoshilongo olya lulila epangelo noya etitha ku hwahwamekwe eimangokumwe lyaayehe ye na mo ontumbu moshinima shika opo ku keelelwe omaso taga zi mokuhingilila ondapo ya pitilila, okuhinga iihauto kaa yi na ongushu okweenda kopate oshowo aahingi mboka ihayi iyutha kooveta dhomoondjila,” Tweya ta ti.
Omukundu omunene gu nasha negameno lyomoondjila ompumbwe yokukonakona muule iiponga yomoopate opo omauyelele ga monike mo kOpolisi yaNamibia kutya oshike naanaa hashi etitha iiponga.
“Onda hala okupandula oMVA sho ya eta po edhiladhilo okuninga oshigongiilonga shika, nondi na etegameno kutya oyendji yomaapolisi yaNamibia otaya ka dheulwa okungonga omishangwahokololo dha nuka po dhiiponga yomoondjila. Omadheulo ngaka otaga ka pyokola aanambelewa yopolisi okuninga omakonakono giiyetithi yiiponga opo ku katukwe oonkatu dha kwata miiti kombinga yokugandja omageelo nenge okufutila iihakanwa,” omupehaminista ta ti. Pethimbo ndika oMVA kayi na oshinakugwanithwa shokugandja egameno lyomoondjila, kakele oshinima shika osha tothwa mo kutya osha simana okuningwa kehangano ndika shi vulithe ashike okufutila iihakanwa.
“Epangelo olya gandja osheetwapo shalyo moshinima shika moka Aanamibia oyendji ya kala taya mono omauwanawa okuza mosheetwapo shegameno lyomoondjila,” Tweya ta ti.
Ekoko lyeliko neshilipaleko lyopaumwene otayi vulu ashike okwaadhika uuna aakwashigwana ya shilipalelwa kutya oomwenyo dhawo itadhi kanene miiponga yomoondjila.
“Epangelo olya koneka neitulomo enene onkandangala tayi dhanwa koMVA nOpolisi yaNamibia piiningwanima yiiponga yi nyanyalitha mpoka aantu oyendji ya kanithila oomwenyo dhawo.
Inspekta-Ndjayi gOpolisi, Sebastian Ndeitunga okwa londodha nokuguna aanambelewa yopolisi ya kale kokule nomikalo dhuulingilingi dhoka tadhi yi moshipala iilonga yuuyuuki.
Inspekta ta indile uuministeli wuuyuuki wu gandje omageelo gonyanya koonakweetitha iiponga yomoondjila unene moka mwa sila aantu.
Pethimbo ndika oonakweetitha iiponga yomoopate ihaya pewa omageelo oshoka iipotha yawo ohayi tendwa mo ashike momambo gompangu, Ndeitunga ta ti.
Phillip Amunyela omunashipundi goMVA ota ti iiponga yomoopate oyindji ohayi etithwa komakonakono inagi ihwapo nenge ga nkundipala giiponga.
“Oshiketha shoMVA, pashinakugwanithwa shawo, ohashi futu iihakanwa yiiponga ngele oye shi ulike kutya omuhingi oye e na ombedhi nenge okwa li ta hingi nuuhasha noku na ombedhi mushika.
Nonkambadhala okuyanda omageelo, oondalayiva odhindji ohadhi gandja ombedhi kiiyetithi yilwe ngaashi omatayela ga topa, iinamwenyo nenge omapuko galwe miihauto yawo, shoka hashi etitha iihakanwa oyindji yi kale inayi mona omauwanawa ga pumbiwa unene okufutilwa nenge okumona epango lyopaunamiti okuza moshiketha. Oshikwawo, omakonakono ga nkundipala ohaga etitha iihakanwa oyindji yiiponga yomoopate yi ndope okugandja uumbangi wolela kutya oondalayiva odhi na ombedhi nenge odho dha etitha iiponga,” Amunyela ta ti.
Oshigongiilonga shoka osha longekidhwa nokapandi N$194 000 okuza moshiketha shoMVA.