WINDHOEK
Ontotwaveta yOmapendafule gEkondjelomanguluko ndjoka ya silwa ondjala koyendji, okwa li ya tseyithwa kOminista yIinima yOonakulwa yEkondjelomanguluko, Dr. Ngarikute Tjiriange metiyali. Minista ota ti ontotwaveta ndjika otayi gandja uuthemba kEpangelo okukoleka nokuzimina ekuthombinga nonkandangala ya dhanwa komapendafule miita yekondjelomanguluko lyoshilongo nokutaamba ko “oshimpwiyu showina shokugandja omauwanawa komapendafule pamwe naapambele yawo.”
Tjiriange okwa tseyithile Omutumba gOpashigwana kutya Ontotwaveta ndjika itayi ka vula okukwatela mo aantu ayehe oshowo iilonga ayihe ya guma ekondjelomanguluko, oshowo kutya aantu yamwe mboka ya dhana onkandangala meukililo nenge shaashi meukililo otashi vulika ya kale inaya kwatelwa mo mefatululo “lyomapendafule.” “Kakele, itashi ti kutya iilonga nonkandangala ya dhana inayi simanekwa,” Tjiriange ta ti.
Ontotwaveta otayi fatulula kutya “ependafule” olye nokugandja uuthemba okutota po Oshiketha shOmapendafule moka tamu ningi hamu zi omakwatho gopashimaliwa taga ka pewa omapendafule pamwe naapambele yawo oshowo okukwatha aantu mboka ya kuthe ombinga mooprojeka dhopamahupilo.
“Elalakano lyOntotwaveta okuyambula po omuthika nonkalamwenyo yomapendafule noku ya kwatha ya kale nonkalamwenyo li nawa,” Tjiriange ta ti koshifo shika. Moonkundathana dhowina noshifo shika, Tjiriange ota ti ina tegelela nando “omayogelelo gopapolotika” shi nasha noshikalimo shOntotwaveta. “Kandi wete pe nasha sha nika uulingilingi mOntotwaveta ndjika,” Minista ta ti, nokunyana omapopyo ngoka taga ti Epangelo olya kala momadhiminiko gopapolotika okuza kaaningi yomahololomadhiladhilo oshowo omaindilo taga ningwa kOkomitiye yOmauwanawa gOonakulwa Aakulu hoka ka kala pula omauwanawa giilyo yako kOngundu yoSwapo nEpangelo. Okomitiye ndjoka otayi pula omauwanawa noshimaliwa koomuma omolwekuthombinga lyawo miita yekondjelomanguluko. Tjiriange ota ti efatululo lyomapendafule itali ti omapendafule “giita.” “Hakehe Omunamibia ependafule,” Minista ta ti. “Hakehe omuntu a li kombanda yoshilongo (ano mboka ya yile muupongekwa pethimbo lyiita yekondjelomanguluko) e li ependafule. Ihe aantu oya hala okulongitha omwaka ngoka gu li po okuthiminikila iinima yi ninge mompulukuta, nelalakano okuya mo nokumona mo omauwanawa. Tse inatu hala okuninga iinima nevundakano,” Tjiriange ta ti.
Ota ti shampa ontotwaveta ya ningi oveta mboka ye na okumona omauwanawa otaya ka tothwa mo nomauwanawa otaga ka longwa mo nawa.
Ontotwaveta otayi fatulula “ependafule” kutya oshilyo kehe shomatanga gekondjelomanguluko; omuntu ngoka a kutha ombinga pwaa na etengauko miilonga kehe yopapolotika, yopaudiplomate nenge iilonga yomonanguwi okuhumika komeho iita yekondjelomanguluko; oshowo omuntu kehe ngoka a kwatwa molwiilonga ye yopapolotika yekondjelomanguluko – kutya nee omoNamibia nenge palwe a pangulilwa shi nasha nekwatathano lye niita yekondjelomanguluko nokutulwa mokakuma/mondholongo.
Moonkundathana noshifo shika, Tjiriange okwa tsu omuthindo kutya efatululo ndika inali patela pondje aantu mboka ya lwila ekondjelomanguluko lyoshilongo paendondo dhilwe pondje nenga shaashi mewiliko lyoSwapo.
“Omuntu okwa pumbwa ashike okugwanitha po iitegelelwa, kutya nee okwa li mongundu yini yopapolotika. Kashi na okutalika ko ashike kutya okwa lwa mewiliko lyoSwapo,” Minista ta ti. Ta gwedha po kutya efatululo “lyependafule” otali tala ashike “kesimano noonkandhala dha dhanwa pwaa na omalimbililo” kaakwiita nenge aakwashigwana pethimbo lyoondondo dhayooloka dhiita yekondjelomanguluko.
“Efatululo otali tsu omuthindo ketompelo ndika kutya aantu mboka ye na omuthika gokuninga omapendafule oyo mboka ya dhana onkandangala mekondjelomanguluko,” Tjiriange ta yelitha.
Ontotwaveta natango otayi gandja ompito yokushangitha omapendafule pamwe naapambele yawo, nonando Tjiriange ina vula okugandja omuyalu