OSHAKATI – Elelo lyondoolopa yaShakati otali hiya oshigwana shi ninge omayindilo gomahala guutala womangeshefelo komaudhano taga ithanwa ekopi lyaMayola, ngoka ge li okuza mesiku lyotango sigo gane gaMei nuumvo. 

Sha ikolelela komushangwa gwa pitithwa kelelo lyondoolopa, oofooloma odha pita mo na kehe gumwe okwa manguluka okuninga omayindilo. 

Oofooloma otadhi adhika poombelewa dhelelo lyondoolopa yaShakati. 

Ya shanga kutya ofooloma otayi pula ashike N$100, naangoka ta ka pita mo ota ka futa oondando N$1 500 yokatala. 

“Otaku ka ningwa otumbutumbu, ngoka omunelago oye ta ka pewa okatala. Esiku lyahugunina lyokuninga omayindilo omasiku 24 gaApiilili potundi 10h00,” ya shanga ngaaka. 

Oya fatulula wo kutya oshimaliwa shoka tashi ka futwa sho taku ningwa omayindilo ihashi galulwa. 

Oya shanga kutya okatala kiilandithomwa hoka omwa kwatelwa iikulya niikunwa. 

Onkene elelo lyondoolopa lyaShakati otali kumagidha oosipana ndhoka dhi na ehalo okukutha ombinga momaudhano moka, ya tameke okwiinyolitha nena. 

Omaudhano ngoka otaga ka ningwa oshikando oshitihamano nuumvo. 

“Omumvo nguka omaudhano ngaka otaga ka kala ga yooloka komakwawo agehe ga ningwa omimvo dha piti, oshoka omwa ningwa omalunduluko,” ta popi ngaaka. 

Elelo lyondoolopa, olya topola omaudhano goko ompad h i moongundu mbali. 

Oya nyola kutya ongundu yotango oyaamati yaanyasha, mboka taya ka topola oshimaliwa shoN$60 000. 

Kehe ongundu otayi ki inyolitha koshimaliwa N$1 200. 

“Osipana tayi ka sindana otayi ka mona oshimaliwa N$35 000, ekopi osho wo oombandi dhoshingoli dhi li omu-18. Osipana tayi ke ya puutiyali, otayi ka sindana oshimaliwa shoN$20 000 noombandi dhoshisiliveli dhi li omu-18. Osipana ya landula ko otayi ka mona N$5 000,” ta fatulula ngaaka. 

Okwiinyolitha kwongundu ontiyali oku na N$1 000 kehe mosipana. Oshimaliwa tashi ka topolwa mongundu moka oN$28 500 ndjoka ya kwatela mo oombandi. 

Osipana yotango otayi ka sindana oshimaliwa shoN$15 000 noombandi dhoshingoli dhili omu-18, ontiyali otayi ka mona oN$10 000 noombandi dhoshisiliveli omu-18 omanga yahugunina tayi ka mona oN$35 000.