Charles Ndeumane
ONIIPA – Kansela gwoshikandjohogololo shaNiipa moshitopolwa shaShikoto Vilho Nuunyango okwa ti nonande opu na oohandimwe taya kambadhala okuya moshipala etotepo lyolukanda olupe mOshigambo, ehumokomeho olyi na okuya komeho ngaashi sha thanekwa.
Nuunyango okwa ti ompangela yokutota po olukanda olupe mOshigambo oya li momathaneko gepangelo lyoSWAPO okuza momumvo 2006 ashike oya kala nokukondjithwa koohandimwe mwa kwatelwa ooyene yomikunda yamwe.
Kakele kooyene yomikunda, anuwa aantu yamwe mboka omadhina gawo itaaga vulu okutumbulwa oya kala nokuunganeka aakwashigwana ya kondjithe etotepo lyolukanda ndoka, taya longitha ooyene yomagumbo ngoka ga gumwa kehumokomeho ndyoka opa ya tinde okulongela kumwe naanambelewa yepangelo mboka taya ningi omatalelo mOshigambo Proper moka tamu totwa olukanda.
“Opu na aantu yamwe taya pukitha oshigwana moshinima shika, taya hwahwameke aantu ya tinde ehumokomeho ndika. Onda hala okuyelitha kutya oproyeka ndjika kayi shi yandje, ndjika oproyeka yepangelo yi na sha nuuwanawa woshigwana osho wo ehumokomeho lyoshitopolwa shetu. Ongakansela iilonga yandje okukwashilipaleka kutya ooproyeka dhepangelo odha tulwa miilonga ngaashi sha thanekwa,” Nuunyango ta ti.
Anuwa yamwe yomaantu mboka taya longithwa okukondjitha oproyeka ndjoka kaye na omapya nenge omagumbo mpoka tapu totwa olukanda ndoka noinaya gumwa nande osha. Ooyene yomikunda yamwe anuwa oye li ompinge oshoka ohaya mono iimaliwa mokulanditha omahala momudhingoloko moka noye wete kutya ngele opwe ya olukanda itaya vulu we okulanditha po omahala.
“Otwa adha nale euvathanotsokumwe naaleli yopamithigululwakalo oyendji nooyene yomikunda, ashike opu na ooyene yomikunda aashona lela taya kambadhala okuya oproyeka ndjika moshipala shaashi ngiika ohaya li mo nawa mokulanditha omahala.
Ehala momukunda olyi na ashike N$600 ashike ngashiingeyi opu na ooyene yomikunda yamwe haye ga landitha okuza N$4 000 sigo N$35 000 lwaampo. Aashigambo aantu aawanawa out yas hi, kaye na uudhigu nehumokomeho. Momasiku tage ya otatu ka ninga oshigongi noshigwana opo tu ya yelithile nawa,” osho Nuunyango a popi ngaaka.
Nonande pe na omashongo ngoka, Nuunyango okwa koleke kutya oproyeka otayi yi komeho nopethimbo mpaka aanambelewa yepangelo oyi ipyakidhila nokutalela Oshigambo Proper nokuninga omathaneko gomayakulo ngoka taga etwa po.