WINDHOEK Ookampani nomahangano 15 okwa tegelelwa ga holoke komeho gOmpangu yaMengestrata moKatutura sho ga ndopa okwiiyutha koveta yoAffirmative Action Act yomumvo 1998, mokati komadhina ngoka omwa kwatelwa oshifo The Namibia. Okuniwe eitaalo kutya omahangano agehe oga taalela omatamaneko gokundopa nenge okugandja omishangwahokololo kwa kotoka dhi nasha noAffirmative Action, okutameka momumvo 2001 sigo 2004. Omahangano nookampani dhimwe otadhi tamanekelwa okwaaiyutha koveta ndjoka sha kwatela mo omvula yimwe awike, omanga ookampani dhilwe dha ndopa mushika uule woomvula odhindji. Ombelewa yOmutamaneki-Ndjayi oya gandjele ompito yimwe komahangano gamwe okufuta oshimaliwa shontumba ongezimino lyagwo okwaaiyutha koveta andola ge shi ninge eti 10 April nenge okuholoka komeho gompangu eti 16 April. MOmaandaha okampani ashike yedhina Fedelity Services Namibia Group oyo kwali yi na okuholoka mompangu. Omupeha-kuluntuwiliki goEmployment Equity Commission (EEC), Ottniel Podelwitz, ota ti iihokolola yompangu oya tsikilwa. Omunaveta gwehangano ndyoka ota ti aniwa Ombelewa yOmutamaneki-Ndjayi inayi gandja elombwelo lyokuholoka kompangu kehangano ngaashi tashi uthwa andola shi ningwe muule womasiku 14. Oshifo shoThe Namibia sigo oompaka inashi mona elombwelo ndika okuholoka mompangu, osho omukuluntu gasho Gwen Lister ta ti sho a pulwa a tye ko sha metiyali. Lister ota ti omatamaneko taga ningilwa oshifo shika oge nasha nokutuma omushangwahokololo gwasho kwa toka – ano omasiku ashike omashona momumvo 2001 – omumvo ngoka omishangwa dhokomumvo dhi nasha noveta ndjoka dha tameka okudhengela. “Okuza mpoka inatu ndopa we mushika, ihe kandi uvite ko kutya omolwashike tu na okugeelwa,” Lister ta ti. Omahangano galwe ga taalela omatamaneko ongaashi Mondi Pak Namibia Ltd, Global Food Services, Lewis Stores, Wispeco, Luderitz Smokeries, CC Spar noProfessional Security Services. Ookampani dhimwe ongaashi H.A.M.S Security, Service Springer Schokoladenfabriken, Santam Namibia, Hero Construction, China Jiangsu International Namibia, Blue Ocean Products noSupreme Furnishers. Podelwitz ota ti ina shilipalelwa kutya omolwashike Ombelewa yOmutamaneki-Ndjayi ya pa omahangano galwe ompito okufuta N$300 ongezimino lyondjo noku shi tala ko kutya omahangano otagi ki iyutha kiinakugwanithwapo yoveta yoAffirmative Action.