Aaulikwa ye li methigathano lyopauleli wopaundemokoli ya thikama muukandidaate wuupevi-presidente woSwapo, oya talele po Ohamba yaUkwanyama.
Omuprimaminista Saara Kuugongelwa-Amadhila, omupeviprimaminista Netumbo Nandi-Ndaitwah oshowo minista gwomidhingoloko iihwa nomapashiyono Pohamba Shifeta, Etiyali oya talele po Ohamba yaUkwanyama meekulu Martha Mwadinomho yaKristian Nelumbu.
Aaleli mboka ye li methigathano lyuukandidaate wuupevipresidente woSwapo, oya li ya talele po Ohamba kOmhedi moshitopolwa shaHangwena nomalalakano giikalekelwa.
Nonando kakwa li ya popitha Ohamba pethimbo limwe okwali ya yelitha kutya, itaya vulu okuya megumbo, ihe inaya kunda mwene gwegumbo.
Kuugongelwa-Amadhila ngoka a li a thiki puuhamba tango, okwa li a fatulula kutya okwa kala moshitopolwa sha Hangwena omasiku omashona, nokwa li a ende omikunda odhindji.
“Onda ndhindhilike omaupyakadhi ogendji ga taalela oshitopolwa shaHangwena, ngaashi ompumbwe yoondjila, yiipangelo yoosikola nosho tuu. Ihe onda ndhindhilike uupyakadhi unene womeya,” ta popi ngaaka.
Ta ti, uupyakadhi womeya owa pumbwa okukandulwa po meendelelo oshoka omeya ogo omwenyo noga simana monkalamwenyo ya kehe gumwe.
Kuugongelwa-Amadhila ta ti, ngele uupyakadhi womeya wa kandulwa po, omaupyakadhi omakwawo taga landula ko, oshoka, nonando omvula inayi loka nawa, omeya opo ge li.
‘’Onda hala natango okuyelitha kutya, out li methigathano, ihe itatu kondjo nando, otatu dhana etanga,” ta popi ngaaka.
Ta ti, ayehe aantu yamwe, yongundu yimwe, naangoka taka sindana, oye ashike.
Omalenga gopamuthigululwakalo melelo lyOukwanyama oga li ga nyenyeta omaupyakadhi ge ya taalela moshitopolwa, oshowo shoka ya hala okuningilwa okuhumitha komeho oshitopolwa shawo.
“Otu na uupyakadhi womahooli taga ndjondjelwa moshilongo, iimuna tayi kana oshowo oohauto tadhi yakelwa moAngola ee tatu kana,” taya nyenyeta ngaaka.
Taya ti, ayihe mbyoka otayi holoka omolwoongamba ndhoka dhaa na ekondololo lyoonkondo.
Ya ti, iilongo mbyoka Angola naNamibia oya kala nokulongela kumwe, yi na uukumwe wu li nawa, oshike paife itaayi tula po elongelokumwe lyomangeshefelo?
“Ngele omahooli oge na ombiliha koAngola, oshike Namibia itaayi mongeshefa nAngola. Natango otwa hala okanala komeya, ka tungwe koongamba opo uulunga wu shonopale.
Okanaala otaka ka kwathela oshigwana shetu poompito odhindji, oshowo okukandula po ompumbwe yomeya,” ya popi ngaaka.
Minista okwa li a yamukula kutya kombinga yongeshefa yomahooli pokati kaAngola naNamibia, omapangelo ngaka gaali otaga ka kuutumba nokukundathana opo ge ye po netokolo. Oga tegelela ashike omahogololo ga pwe koAngola.
“Kombinga yokanaala taka tungwa koongamba, shoka okwa li sha tseyithilwa NamWater nokwa li a yamukula kutya, otaya ka kundathana nkene ye na oku shi ninga,’’ ta yamukula ngaaka.
Nandi-Ndaitwah okwa li a popi kutya okwe ya moshitopolwa shaHangwena, e ya okuuvitha ko oshigwana, kutya oshike shi na oku mu hogolola.
“Ngame omuulikwa e li mondjila, inandi pogola pethimbo lyandje lyiilonga, onkene ondi wete kutya onda gwana okupewa natango oshikando shokulela,” ta popi ngaaka.
Ta ti ehogololo uuthemba womuntu yemwene, onkene okuza komayiuvo gomuntu nkene nenge olye ena okuhogolola.
Nandi-Ndaitwah okwa ti, oya enda miitopolwa yi li iheyali, notaya tsikile sigo ya mana ko iitopolwa ayihe 14.
Shifeta esiku ndyoka okwa li a tsike iimeno kuUhamba, onga oshinakugwanithwa shoku indjipaleka omiti mokati koshigwana.
Minista gwomindhingoloko, omakuti noalweendotalelopo okwa li a tsike omiti omolwesimano hadhi dhana mokati kaantu.
– vkaapanda@nepc.com.na