Charles Ndeumane

Ookansela yatatu mboka ye li iilyo yongundu yoSWAPO oya kuthwa miilonga kelelo lyondoolopa yaWalvis Bay molwaashoka anuwa oya yi kondje yomilandu pethimbo ya li moshigongi nookansela ooyakwawo.

Mayola gwondoolopa yaWalvis Bay Trevino Forbes okwa ti elelo olya li lya ningi oshigongi showina shelelo moka elelo lyondoloopa lya tokola lyi kuthe ookansela yawo yatatu miilonga shi ikolela komilandu ndhoka dhi li po ethimbo lyuule womwedhi gumwe, okuza mesiku lyotango sigo 30 Sepetemba. 

Mboka ya kuthwa miilonga oyo Ephraim Shozi, Albertina Nkoshi, oshowo Paulus Kauhondamwa.

“Etokolo ndika olya landula omakuyunguto ngoka ga holokele moshigongi, mokwa mwa popiwa iitya iinaayi opala, ookansela mboka yaali oya kuthwa miilonga sho ya taaguluka oompangu nomilandu, nomukwawo okwa kuthwa miilonga sho a taaguluka oompango nomilandu oshowo oku a kondje yomilandu dhomaihumbato gookansela. Shi ikolelela komilandu ookansela oye na uuthemba wokukuthutha miilonga ookansela aakwawo miilonga uule wethimbo inaa i pitilila omwedhi gumwe,” osho Trevino Forbes a ti.

Ekutho miilonga lyookansela mboka olya tamanekwa komukwatakanithi gwoSWAPO moshitopolwa shErongo Daniel Muhura, ta ti nkene elelo lyondoolopa yaWalvis Bay lya yile momake gongundu yompilameno kali na we elandulathano. 

“Itatu shi pitike noitatu shi kutha ko onga shanathangwa. Ndhika ookansela dhoSWAPO, inadhi tulwa miilonga kongundu yo-IPC, no kaye na esiku ya tile oya ninga po iilyo yo-IPC, ngele opu na shoka ookansela dhoSWAPO dha ninga sha puka, SWAPO oye e na okuungaunga nadho,” Muhura ta ti.

Muhura okwa tsikile ta ti IPC ke na uuthemba wokukutha miilonga ookansela ndhoka haaye e dhi tula miilonga. Okwa ti etokolo ndyoka otaye ke li kondjitha.

–mrndeumaneraycharles@gmail.com

Caption: Ya tulwa pohi… Ookansela yatatu ya kuthwa miilonga kelelo lyondoolopa yaWalvis Bay.