ONGWEDIVA- Ookansela koikandjohoololo ya yooloka otava hokolola tava ti eendjambi davo oda niga po dokulanda oikulya yoshiwana moikandjohoololo yavo.
Okwa didilikwa onghalo yoshikukuta ya etela oshiwana ondjala unene tuu koitukulwa yokonooli.
Kansela woshikandjohoololo Uukwiyuushona Andreas Amundjindi ota ti moshikandjohoololo shaye omo mu na yoo noshiwana shovayelele omu na ovakwashiwana vahapu tava dengwa kondjala.
Amundjindi okwa ti oshiwana oha shi kala alushe sha ngudumana kombelewa yaye tashi kwena ondjala ashike ka pena sha oikulya yoku yandja.
“Paife ohandi longifa oshimaliwa okudja mondjato yange mwene opo ndi dule okulandela oshiwana oikulya,” ta ti.
Kasnela okwa yelifa ta ti oshikandjohoololo shaye osho shi na omwaalu muhapu woshiwana shovayelele osho shi na mo omaumbo 41 e li momikunda dayooloka.
Ta ti kakaele koikulya, okwa tameka yoo oku longifa oshimaliwa shaye mwene oku landa oikutu nomakumbafa ovakwashiwana veli momhumbwe.
Ovanhu vomuhoko wOvasan vahapu kave na omapya, ihava limi. Paife eshi odula inai loka oshiwana eshu luhapu eshi hashi xupu moikulya hai di kepangelo, nasho osha taalelwa kondjala shaashi omuvalu wovanhu tava pumbwa oku palulwa kepangelo owa indjipala.
Amundjindji okwa indila oshiwana opo shi yambidide ombelewa yaye noikulya, oidjalomwa noikumbafa molwashi ovanhu ova pumbwa omakwafo.
Okwa weda po ta ti unene tuu pefimbo e li loutalala oshiwana shovayelele osha ninga oihakanwa yokudengwa koutalala shaashi ka pena oikumbafa.
Okwa ti okwa pandula epangelo eshi ta li twikile nokuyandjaneka oikulya koshiwana.
Kansela woshikandjohoololo shaGuinas Martinus Elia okwa holokola ta ti naye oha longifa oshimaliwa okudja modjato yaye okulandela oshiwana oikulya.
“Itashi ulike efano liwa ngeenge oshiwana sha kalela ombelewa tashi kwena ondjala ndele kansela ke na eshi ta ningi po,” ta ti.
Elia okwa ti ota lalakanena okuyambidida oshiwana nokukwashipaleka kutya ka pena omunhu ta nangalele ondjala.
“Ohandi longifa yoo va li notuwa yange okuningila ovanhu omafudiko moshikandjohoololo shange. Ovanhu vamwe ihava kala ve na oshimaliwa shokulanda oshikefa,” ta ti.
Kansela okwa ti omwedi wa djako okwa yandja oikumbafa noidjalomwa kovanhu va dja komikunda da yooloka.