WINDHOEK Ooyene yoombashu mboka ya ninga omaindilo goolisinisa dhoondingosho dhawo okwa tegelelwa ya ka uvithwe nayi sha landula ketokolo lyOshilando shaVenduka okutula po oveta ompe ndjoka tayi ti “okambashu kamwe mepandaanda limwe.” Etokolo ndika etalala olya ningwa nelalakano okukondolola nokupatitha oombashu noondingosho dhoka dhaa li paveta momalukanda gayooloka mOvenduka. Pauyelele womushangwahokololo gOshilando gokomwedhi otagu ti, “okambashu mepandaanda kehe.” Shika osha hala okutya omuningi awike gumwe gweindilo ta ka pitikwa a kale nolisinisa molukanda mepandaanda limwe. Tashi ti itapu ka pitikwa nando oombashu mbali dhi kale dha tegama uule woometa 200 pokati koondingosho.” Omulanduveta gu nasha nOongeshefa Oontshona, Oongeshefa dhOmomapandaanda nOondingosho ngoka gwa ziminwa kOlaata yoshilando eti 28 Septemba omvula ya zi ko otagu ti: “Itapu ka ziminwa nando omaindilo omape getendululo lyomahala omashona gokukala momapandaanda omanga omulanduveta nguka inagu ya miilonga.” Ngele ope na aaningi yomaindilo yaali nenge ye vulithe po ye li uushiinda, eindilo lyaangoka e na ehala enene nolya andjuka nawa mepandaanda enene olyo tali ka talika ko tango. Omaindilo taga ka talika ko tango ogo wo ngoka gomahala ge li mookolonela dhomapandaanda. Shika otashi ka ningwa ngele eindilo ndyoka lya ningwa kOshilando shaVenduka otali iyutha komalandulathano nooveta dhoka dhi li po, dhoka tadhi wilike etungo lyondunda yokulanditha iikolitha/ondingosho. Omunambelewa gomakwatathano noshigwana, Liz Sibindi ota yelitha kutya ngele ondingosho oyi na olisinisa otayi ka pitikwa yi longe, ihe dhoka kadhi na uuthemba otadhi ka patwa. Onkundana ndjika oye ya pethimbo ndyoka Oshikondo shOmathaneko gOshilando nOmudhingoloko shi ipyakidhila nokungonga po omulanduveta gu nasha nOombashuokukundathana kombinga unene kooveta dha thanekwa dhi nasha nomaindilo goolisinisa dhokulanditha iikolitha/omalovu ongoshinima shomeendelelo. Pethimbo ndika, oondingosho noombashu dhiikolitha otadhi monika konyala momalukanda agehe moshilandopangelo, nopoompito odhindji mepandaanda limwe egumbo etiyali kehe oli na okandingosho nenge ombashu. Olukanda ndoka lwa shiga ko moombashu olwo Goreagab, moka konyala egumbo kehe lyomomagumbo 16 li na ondingosho, omanga paempito odhindji egumbo limwe kehe lyomomagumbo 75 moKatutura li na ondingosho naashika osha talika ko shi li hwepo. “Ondoolopa yaVenduka ohayi zimine omaindilo 200 lwaampoka momvula kaantu mboka haya longele momagumbo oshowo omaindilo gomatendulula gomahala ge li 80,” Sibindi ta yelitha. Ihe omolwonkalo yenyakatalo nendumbakano lyoombashu, oshigwana ohashi nyenyeta omakudhilo okuza pomahala gomanwino. Uupyakadhi wumwe owo mboka wondondo yelongitho lyiikolitha sha pitilila neindjipalo lyiilonga yiikulumuna omolwelongitho lyiikolitha. Omathimbo ga zi ko, Opolisi yomoshilando pamwe naandjoka yaNamibia oya holola elimbililo lyawo shi nasha niikulumuna tayi yi pombanda pomidhingoloko dhoondingosho oshowo momilamba. Monkambadhala yayo yiikonga yokukeelela iimbuluma, aanambelewa yegameno oya yuga ko iilwitho yomaludhi ngaashi oombistoli noombele kaantu mboka ya adhika poondingosho nopomidhingoloko. Okuza muAguste, Opolisi oya kwata ko oondjembo 79 kadhi na oombapila oshowo oombele moombashu nomahala gomanwino. Oshigwana oshe shi tala ko kutya omanga nee oombashu hadhi gandja oompito dhiilonga, odhi li wo omahala giimbuluma mpoka hapu dhipagelwa aantu, omayugo kwahomatiwa oshowo omaimangeleko. “Okweenda noombele mokati kaantu oshi li oshikoya/eyono nangele owa monika to ende nombele mondoolopa nokuningila aantu omatilitho nayo nena oto ka tulwa miipandeko,” osho Inspekta Omukuluntu mOpolisi yaNamibia, Angula Amulungu ta ti. Oshilando shaVenduka oshi na oshinakugwanithwa okutula po ooveta nomalandulathano gokukondolola nokushunitha pevi omaupyakadhi taga etwa koombashu dhiikolitha moshilandopangelo. Oshilando oshi na ishewe uuthemba okuhulitha po olisinisa yokulanditha iikunwa ngele aakwashigwana ohaya nyenyeta iikuluma nomiyonena shi ikwatelela kolopota yokomwedhi. Omatompelo galwe okukutha ko olisinisa oga kwatela mo omaihumbato gomatukano, okunyateka – okusitamena nokuyila kiihwa pomahala goshigwana ngaashi hashi lopotwa konyala oshiwike kehe. Oshowo okukeelela nokwiimba omainyengo gaantu momapandaanda nomiyelo dhaashiinda omolwomainyengo gongeshefa. Omolwomatompelo ngoka, oshilandopangelo osha adha etsokumwe kutya inapu ka pitikwa we oolisinisa mballi dhoombashu hadhi landitha iinima ya faathana dhi kale nuushiinda wuupopepi inau konda oometa 200 pokati kawo. Pokati mpoka, Omupresidende gwEhangano lyOombashu moNamibia, Veripi Kandenge ota ti okuthiminikila ooyene yoombashu ooveta dhika itashi ka kandula po omukundu. Ota ti aatoti yooveta okwa li ashike ye na okutala komikalo dhilwe dhoka dhi uvite ko onkalo moka aantu ye li. “Omuthigululwakalo goombashu itagu ka dhipagwa molwashoka ope na ompumbwe oku shi ninga.