Oombelewa oonene dhoshitopolwa shaShana – Oshana Regional Council, odha pata pakathimbo okuza ohela, sho gumwe gwoomaniilonga a monika omukithi gwoCovid-19.
Shika osha ningwa okukeelela omukithi kaagu taandele gwa uka maaniilonga naayakulwa oshowo na kahe ngoka ha thiki poombelewa mpoka, omanga tadhi pombelwa adhihe.
Omunambelewa gwopokathimbo omukuluntu gwoshitopolwa shaShana Jonas Kapenda, momushangwa ngoka a pititha kiifokundaneki okwa ti oombelewa dhawo odha pata manga, nelalakano lyokugamena aaniilonga naakwathelwa yawo kaya kwatwe komukithi ngoka.
‘’Aaniilonga otaya longele komagumbo. Otaya ka tameka okulonga iilonga yawo ngaashi sha kala, okuza Omaandaha gomasiku 31 gaAguste nuumvo, “ Kapenda ta ti ngaaka.
Ta gwedha po ta ti, shika otashi gandja ompito kanambelewa yUuministeli wuundjolowele nonkalonawa ya pombele ehala alihe nawa.