Ovakainhu ve li humbata hava di kewalanda loshipangelo Eenhana va ti inava hafela efiku olo va tulilwa po oku kosha oikutu yavo.
Onga onghendabala yoku ndalapatela elongifo lomeva, ovanambelewa veli nekelelwa etonatelo lewalanda, va ti ova tula po efiku limwe moshivike omo ovakainhu ava, va kale tava wapaleke oikutu yavo. Ashike oomeme ovo otava nyenyeta va ti efiku limwe moshivike inali wana.
Pefimbo Kundana a talela po ewalanda, ovakainhu ava otava hokolola kutya ova inava efelwa okukala tava kosho keshe efiku shaashi omeva va ti oku na ondilo.
“Otwa lombwelwa kutya omeva okwa pita noshimaliwa shihapu,” umwe womovakainhu ta hokolola.
Ewalanda onhele oyo hai kala ovakainhu ve li momateelelo vadja komikunda dili kokulele noshipangelo opo va teelele ngeenge ve li popepi noku puluma.
Ovakainhu hava di komikunda dokokule ohava kala moudjuu woku fika koshipangelo pefimbo ngeenge tava fetwa onghee ova tungilwa po ohele ili li popepi noshipangelo.
Oomeme ava ohava futu ashike oN$22.50 koshivike oyo ya kwatela mo omayakulo ayeshe ngaashi omeva, olusheno nomulele, ashike oha ve li landele oikulya yavo vene.
Omukainhu umwe a ninga eemwedi mbali melanda okwa ti ngeenge ova hangika tava kosho momafiku oo inaa pitikwa, oikutu yavo ohai kufwa po ndele tai twalwa mombelewa yomutonateli wewalanda.
“Ohatu pulwa opo tu fute oshimaliwa shehandukilo N$20 ile N$15 ngeenge twa hangika a tu kosho momafiku oo ina pitikwa. Ngeenge omunhu ina futa oikutu oko ohai kala kombelewa oko, fiyo a tei futile ko,” ta ti.
Omukainhu umwe okwa weda po ta ti ihashi kala shiwa ngeenge omukainhu e li meetelo ndele okwa djala oikutu ya kaka onghee osha fimana opo va kale tava koshi oikutu yavo efimbo keshe.
Otava pula elelo lodoolopa yaEenhana opo li kale la kandula po oshikumungu eshi.
Ova weda po tava ti ova taalela omashongo ngaashi okuhe na oikulya, okukatyava oikuni kokule momifitu noshoyo okunangala pedu shaashi meenduda omu yadi, itava wanamo.
Eshi a kwatafana naKundana omunambelewawiliki welelo lodoolopa yaEenhana Benjameni Gabriel okwa ti ombelewa yaye otai ka ninga omakonaakono moshinima eshi.