Esiku lyoomeme lyopaigwana ndyoka hali dhanwa aluhe momasiku 8 Maalitsa muuyuni, olya dhanenwa mOshakati.
Esiku ndyoka okwa li lya gongaleke aakiintu okuza momalukanda ga yooloka mOshakati, nokwa li ya gandja omanyenyeto gawo omolwomahepeko ya taalela, taya ti inaya manguluka we. Oomeme ya thika po40 oya li ya gongala molukanda Evululuko noya li ya kundathana uuthemba waankiintu nuunona wu simanekwe nomahepeko ga hulithwe po.
Omumvo gwa zi ko natango aakiinutu mOshakati oya li ya gongala nokugandja omanyenyeto ga fathaana komeho gangoloneya gwoshitopolwa shaShana Elia Irimari oshowo opolisi yaNamibia.
Irimari esiku ndyoka okwa li a tsu kumwe naashoka oomeme taya nyenyeta, oshoka oshilongo otashi lili. “Omolwoonkambadhala yopolisi noshigwana, oshitopolwa shaShana osha lopota iipotha yomahepeko iishona, okuyelekanitha niitopolwa yilwe konooli,” ta ti ngaaka. Ngoloneya okwa li a kumagidha oshigwana shi hulithe po omahepekathano.
Ta ti kape na uupyakadhi ihau kandulwa po.
Omunambelewa omukuluntu koshikondo shuukashikekookantu mopolisi yaNamibia Monika Erasmus, okwa ti oshigwana osha taalela uupyakadhi oshowo omahepeko ga yooloka ihe itashi lopota iiningwanima mbyoka.
“Omahepeko ohage ya momikalo dha yooloka, gamwe ogokugumwa kolutu gamwe ogopakana,” ta ti ngaaka.
Erasmus okwa ti omakwatho otage ya uuna ga kongwa, onkene oshigwana nashi kale tashi lopota aluhe iiningwanima mbyoka.
Klaudia Andreas okwa ti esiku lyawo olya li unene tali popi kombinga yomakwatokookondo goomeme nuunona nomahepeko gawo.
‘’Inatu manguluka we momagumbo. Iiningwanima paife otayi ningwa kaantu ayehe, oomeme nootate oshowo kaanona. Oshike shi na okuningwa po ano? Ta pula ngaaka.
Momukanda gwawo gwomanyenyeto, oomeme mbaka otaya ti nonando pwa ningwa ooveta ngashi ndjoka yi na sha nomakwatokoonkondo naandjoka yomahepekathano gomomagumbo, omakwatonkoonkondo goomeme nuunona onkene ngaa taga tsikile, go omahepeko goomeme nuunona nago onkene ngaa taga tsikile, ngaashi taku uhala taku kundanwa miikundaneki nosho tuu.
Omukonakoni gwiimbuluma yi na sha nomahepeko guukashikekookantu gopolisi moshitopolwa shaShana Monika Nakanyala, moonkundathana naKundana okwa li a popi yimwe yomwaambyoka a li a koneke hayi eta omahepeko. “Otwa koneke kutya oluhepo nalo otalu dhana onkandangala momahepeko. Unene ngele megumbo kamu na iiyemo ya gwana, ohashi eta omalungwenye, okunyenyeta sigo tashi eta omadhengathano, ngoka haga holoka momikalo dha yooloka mwa kwatelwa okudhipagathana oshowo okumonithathana iiponga,” ta fatulula ngaaka.
Nakanyala natango okwa totha mo elongithonayi lyiikolitha.
Ta ti, omahepeko okupitila miikolitha ohaga vulu okuholoka natango pamikalo dha yooloka. “Ope na aantu mboka haya longo omiyonena konima ya nu iikolotha oshowo iingangamithi oshoka kaye shi shoka taya ningi, ita yoolola ngele oshi li mondjila nenge osha puka oshoka omadhilaadhilo okwe ga piyaganeka niikolitha nenge niingangamithi,” ta popi ngaaka.
Ta gwedha po ta ti ope na natango mboka ya itaala anuwa mokuthigulula omikalo dhaakuluntu yawo, ngaashi okudhenga omukiintu gwe oshoka anuwa nayina okwa li ha dhengwa kuhe.
“Oyendji oya taalela omahepeko ga yooloka momagumbo, ihe oya mbandamekwa, kaaya pitithe mo omawuyelele ngoka. Opolisi ohayi longele kumwe naahungimwenyo, mboka oyo ye na ontseyo nkene nakuninga oshihakanwa e na oku eta uuyelele awuhe,” ta fatulula ngaaka.
-vkaapanda@nepc.com.na