OSHAKATI-Ehangano lyokwaandjaneka omeya olya patulula iilonga mehuulilo shiwike lyokutunga ondama onene yoku opaleka omeya ndyoka tayi ka yambindhindha okuandjaneka omeya ga gwana kiitopolwa yokonooli.
Oproyeka ndyoka yongushu oomiliona dha pita N$743 oya ndhindhilikwa onga ya tulwa oshimaliwa oshindji mondjokonona yaNamibia.
Minista uunamapya omeya etalulo lomavi noohi Ingenesia Zaamwani esiku ndyoka okwa popi kutya oproyeka ndyoka onene otayi ulike nkene epangelo lyaNamibia tali longo okuhwepopaleka onkalo yoshigwana.
“Omeya omwenyo, omeya ohaga dhana onkandangala monkalamwenyo yomuntu sho shoka kuna okukwashilipalekwa kutya omeya ogeli a pehe. Ondishi shi kutya opena natango mpoka kapena omeya, ihe otandi kwashilipaleke kutya momimvo ntano twa taalela kehe gumwe okuna okukala eli popepi nomeya,” ta popi ngaaka.
Zaamwani okwa kumagidha wo oshigwana shi kale tashi futu omeya, oshoka NamWater ota vulu ashike okutsikila okuandjeka omeya neyambindhindho lyoshimaliwa okuza moshigwana. Okwa indile wo oshigwana shi hulithepo okuhanagula po iilongithomwa yokuandjaneka omeya oshoka ohayi pula oshimaliwa oshindji okuyi landulula.
Omukuluntu gwehangano lyoNamWater Abraham Nehemia okwa popi kutya oproyeka ndjika onena notayi ka kwathela iitopolwa ayihi yokonooli.
“Iilonga mbika oya tegelelwa oku kala yapwa muule wethimbo lyoomwendhi 26. Otwa londodha wo mboka ya pewa iilonga opo ya gandje iilonga kaakalimo yomomundhilongo,” ta popi ngaaka.
Okwa fatulula kutya ondama ndyoka yili po ya tungilwe momumvo 1996 oyina ashike ompito yookubica meta 40 000 mesiku manga ndyoka tayi tungwa tayi kala yina ookubica meta 90 000 mesiku. Nehemia okwa ti oproyeka ndyoka otayi kala tayi teleke omeya ngoka nokuga opaleka pashinanena omanga inaaga andjanekwa. Omupopiliko gwehangano lyoNamWater Lot Ndamonhomata okwa thindi omuthindo kutya oshigwana nashi hulithepo okuhanagula po iikwathithilonga ya tulwa po oshoka ohayi pula mondjato.
“Ota tu indile wo oshigwana shi longele kumwe na tse opo shi kale tashi lopota mboka taya hanagula po iinima,” ta indile ngaaka.
Ta ti, sho taya hanagula ngaaka otaya shunitha wo epangelo konima, yo tayaka tya epangelo kali na sho tali longo.
vkaapanda@nepc.com.na