OSHAKATI – Uuministeli weyambulepo woondoolopa niitukulwa yokuushayi owa gandja uuthemba komunangeshefa Erastus ‘Chicco’ Shapumba opo a lande po evi lyomatala omakulu mOshakasti koomilina N$8, 05.
Shika oshi li momukanda washainwa komukuluntu wiliki wuuministeli weyambulepo woondoolopa niitukulwa yokuushayi Nghidinua Daniel wa monika koshikundaneki shika.
“Minista omusimanekwa okwa gandja epitiko kOshakati Town Council, sha ikolelela koshiluku oshiti-30 (1) mokatendo 23 komalelo goondoolopa komo1992, ka lundululwa, opo i landithe po Erf 1342 yi li mOshakati Etension 4, yi na uunene wosquare meta16, 177 koMouse Properties Nighty Eight…” ombaapila tai ti.
Mouse Properties Nighty Eight ehangano lyomunangeshfa Shapumba.
Ehala ndyoka tali adhika mondjila onene yondoolopa yaShakati olya kala lyi na omananathano uule wethimbo sha landula sho lya li lya landwa po kuShapumba kongushu yoshimaliwa shoomillion N$2.5 momumvo 2016.
Aatseyi nawa yokukutenda noku tala ongushu yomavi oya li ya tengeneke ehala ndjoka lyuunene woheketa 1.7 lyi na ongushu shi li poomiliona N$17 ngele odhi shona, noomiliona N$45 ngele odhi ndji.
Ondando ndjoka ya li ya pewa Shapumba oya li ya eta oontamanana mokati kiilyo yelelo lyondoolopa noku pula uuministeli opo wu ye mo oonyala. Uuminitsele owa li wa kankameke iipindi mbyoka, oshinima shoka sha yi sigo okompangu.
Mayola gwondoolopa yaShakati Leonald Hango okwa po pi kutya oya tegelela ashike minista gwomayambulepo omikunda nookushayi Erastus Uutoni eya pe omalamba omaziza opo ya ye komeho naashoka ye na okuninga.
“Kandi na natango uuyele kutya ehala ndyoka ota li landithwa kongushu yi thike peni, ashike ondi shi kutya koshimaliwa shoka kwali lya landwa ku sho otaku gwedhwa,’’ Hango ta ti ngaaka. Ta gwedha po kutya ehala ndyoka okwali lya landithwa kelelo lyondoolopa lyaShakati mekwatelo komeho lyaaleli aakulu. Omukuluntu gwelelo lyondoolopa lyaShakati Timoteus Namwandi okwa ti, ke na uuyelele kombinga yelanditho lyomatala natango. “Uyelele mboka ina u thikandje natango, onkene itandi vulu okutya ko sha paife,’’ ta ti ngaaka. Chicco sho kwali adhengelwa o po atyeko sha kehokololo ndika, okwa ti, okuli kofaalama onkene i ta vulu okupopya mongodhi, mpoka e li ota pu kudhile.
-vkaapanda@nepc.com.na