Kuzeeko Tjitemisa
WINDHOEK – Ominista Yoohi nOonzo Dhomomeya Bernhard Esau opamwe nominista Yuuyuuki Sacky Shanghala oya li yi ikutha miilonga ohela konima sho omadhina gawo ga li taga finyaafinywa moshikungu shokupewa oombumbo dha adha poomiliona N$150. Oominista ndhika mbali odha li dhi ithanwa mbala kEgumbo Lyepangelo kuPresidente Hage Geingob sha landula oolopota dhiikundaneki. Shi ikwatelela komupopiliko gwombelwewa yaPresidente Alfredo Hengari, omupevipresidnte Nangolo Mbumba naye wo omo a li moshigongi shika.
“Neuveko kutya omapopyo giikundaneki oge na ondjundo moshinima shika, Esau naShanghala oya gandja omikanda dhawo dheikutho miilonga kupresidente meendelelo,” ta ti ngaaka. Ohela, Presidente Geingob okwa li a taamba ko eikutho miilonga lyoominista ndhika mbali nokwa li a ulike pakathimbo Frans Kapofi onga ominista yuuyuuki, omanga omukalelipo gwepangelo gwopaveta Albert Kawana ta ka kwathela pakathimbo kuuministeli woohi. Oshikundaneki shoThe Namibian shoka sha li sha eta onkundana ndjika puuwayela ohela, osha lopota kutya okampani yaIceland yedhina Samherji oya li ya pewa ompito yokukwata oohi dhomakende moNamibia sho ya futu oombumbo dha thika lwopoomiliona N$150 kaanapolitika naanangeshefa pokati ko2012 no2018.
Uuyelele wu li koWikiLeaks otau ti Esau, Shanghala, omukuluntu gwoInvestec Asset Managemant Namibia James Hatuikulipi naTamson ‘Fitty’ Hatuikulipi, ngoka e li oshitenya shaminista gwoohi kwa li ayehe oya kwatelwa mo mefuto lyoombumbo ndika. Mike Nghipunya, ngoka e li omutse gwehangano lya yama kepangelo lyoFishcor ndyoka lyi na oombonge dhalyo moLuderitz naye okwa tumbulwa mo wo moshikumungu shika. Iikundaneki tayi lopota kutya oombumbo ndhika odha futwa neyambeko lyomukuluntuwiliki gwoSamherji, Þorsteinn Már Baldvinsson.
Nakweeta iiholekwa mbika pomutenya, Jóhannes Stefánsson, okwa li omukuluntu gwiilonga yaSamherji moNamibia. Momushangwa gwa tuminwa iikundaneki Esau okwa li a koleke eikutho miilonga lye, ta ti omapopyo ngaka gokudhengela ondhi peho oga li oshitopolwa shokunyateka edhina lye kwaamboka ya hala oku shi longitha onga omukalo gwokuhwahwameka iilwitho yawo yomahogololo.
“Kape na nando ogumwe e ya komeho gandje nuumbangi wiimaliwa nenge uuwanawa wontumba mboka Esau a taamba nepingakanitho niilonga onga ominista,” ta ti ngaaka.
Omuleli gwongundu yompilameno yoPopular Democratic Movement (PDM) McHenry Venaani okwa ti oshiningwanima shika ohulo ashike yoshinima oshinene, ta pula wo opo omaliko gaambaka yaali ga kwatwe ko osho wo ooakaunta dhawo dhoombaanga dhi patwe manga. Omutseyinawa miikwapolitika Ndumba Kamwanyah okwa li a yi mu dhaVenaani ye ta gwedha ko ta ti ongundu tayi pangele yoSwapo nayi tokole ngele otayi ya kaleke momusholondondo gwokuya kopaliamende nenge otayi ya kutha mo. Amushangandjayi gwoSwapo Sophia Shaningwa okwa li a ti ke shi ngele ope na sha oshipe she ya po. “Kandi na shoka ndi shi, lombwela ndje ongoye omutoolinkundana,” Shaningwa ta ti ngaaka.