WINDHOEK
Oominista dhIinima ya guma oonakulwa aakulu okuza koMozambike naZimbabwe oshiwike shika odha kala moshilandopangelo shaNamibia, Windhoek, okutopolelathana omauyelele naNamibia nkene iilongo yawo ye shi pondola okutula miilonga nokuungaunga nomaindilo ge nasha nokufuta mboka ya li nale aakwiita yekondjelomanguluko. Omunawino miinima ya yama omilanduveta mUuministeli wIinima yOonakulwa Aakulu, Natangwe Hamutumwa, okwa kundaneke oshifo shika metiyali kutya Feliciano Gundana a yambukile koMozambike oshowo Sydney Sekeramayi gwaZimbabwe oye li moshilongo notaya ka topolelathana omayele niiyetwapothaneko yi nasha noonkalo dhomiilongo yawo.
Mozambike naZimbabwe okwa li ya tsakanekwa konkalo ya faathana okupulwa okufuta mboka ya li nale aakwiita aakulu.
Hamutumwa ta ti omauyelele ngoka ga gongelwa po poshigongi shoka otaga ka kwatha Namibia mokuvuta po omilanduveta dhUuministeli wIinima yOonakulwa Aakulu dhoka wo tadhi ka tothwa mo lwanima. Hamutumwa ota ti Namibia ota ka kala nohoke neitulomo okutseya mpoka ya tameka oshowo nkene ye shi enda, nkene iikondo yawo yi nasha noonakulwa aakulu ya kwatelwa mo oshowo pomuthika mpoka ye li pethimbo ndika.
“Ngele omuntu oto ningi oshinima oshipe, ohashi kala aluhe oshiwanawa okutala kuyakweni mboka ye shi ninga tango kungoye nokweeta po omukalo gwoye mwene,” Hamutumwa ta ti.
Omutumba ngoka gopamuthika gopauministeli ogwa gongalele metine, naakuthimbinga 20 lwaampoka oya topolelathana omadhiladhilo nomathaneko. Omanga nee iilongo mbika taku tiwa oye shi pondola okutula miilonga oonkatu dhokuungaunga niinima yoonakulwa aakulu, Hamutumwa ota ti Namibia ita ka kutha ashike iiholelwa yawo ngaashi yi li, ihe ota ka tala nkene oshilongo shika tashi ka vula okuungaunga nonkalo shi ikwatelela koompumbwe dhaNamibia.
Omwedhi gwa zi ko, Ontotwaveta yIinima yOonakulwa Aakulu/Omapendafule okwa li ya kundathanwa mOparliamende. Mokuvuta Ontotwaveta, omapekapeko gomuule okwa li ga ningwa shi nasha noveta ndjika okutala kiiholelwa yaZimbabwe, Mozambike, Vietnam naSouth Africa. Ontotwaveta otayi fatulula ǟ