Omukwaniilwa Fillemon Shuumbwa Nangolo okwa pititha oompango ndhoka tadhi ka kala tadhi longithwa komalelo agehe gopamuthigululwakalo mOwambo.
Ta ti, euvathanotsokumwe lya tulwa miilonga lyoompango ndhoka olya li lya nigilwa mOngwediva momumvo 2014, notali ka longithwa komalelo agehe gopamuthigululwakalo gahetatu gomonooli.
“Elalakano lyoompango ndhika okukaleka po nokutula po omufango gumwe, elongitho lyadho nokuninga omatokolo ga faathana momapogolo giipambele yopamuthigululwakalo,” ta fatulula ngaaka.
Ta gwedha po kutya odha tulwa opo dhi longe nodhi kaleke po uuyuuki maakwashigwana ayehe mOndonga.
“Oshigwana moshitunda shaNdonga osha pumbwa okuuvithwa ko nokuyelithilwa nawa oompango adhihe, okukala ye dhi shi nawa otashi ke ya kwathela okutaamba ko omatokolo uuna ya pogola,” ta ti ngaaka.
Shuumbwa okwa li a totha mo omageelo agehe uuna gumwe a pogola, sha ikwatelela koompango dha tulwa po.
Ta totha mo dhimwe dhomudho, kutya uuna omukiintu a ningi etegelelo omanga e li megumbo nenge e li miilonga ota futwa oongombe mbali nenge oshimaliwa N$3 000.
“Ngele a ningi etegelelo uuna a kwatwa koonkondo ota futwa oongombe ndatu nenge oshimaliwa N$4 500. Ngoka a ningi etegelelo pe na euvathano pokati kawo yaali otaya futwa oshimaliwa N$1 500 nenge ongombe yimwe,” ta fatulula ngaaka.
Ta ti, omunona e li kohi yomimvo 18 ota futwa N$4 500 nenge oongombe ndatu.
Ta gwedha po kutya oshilema nenge omukambeli oshowo ngoka e li mosikola otaya futwa oongombe ndatu nenge oshimaliwa N$4 500.
Omukwaniilwa okwa li wo a fatulula kutya oompango ndhoka otadhi ka lundululwa ashike konima yomimvo ntano nenge pe na ompango ya pumbwa okulundululwa.
– vkaapanda@nepc.com.na