Paulina Ndalikokule
ONGWEDIVA – Kakukutu gwetanga lyopolisi Joseph Shikongo okwa pula aakwashigwana mboka ye li ompinge noshimaliwa shoka sha longithwa okutunga eyinda epe lyopolisi lyOshiko Police Checkpoint mOngwediva ya ye kombelewa ye ya ka fatululilwe nkene oomiliona N$12 dha longithwa metungo ndyoka.
Shikongo okwa popi ndhoka pethimbo a li ta patulula pambelewa einda ndyoka mOlyomakaya, ta ti aakwashigwana naya tseye kutya oshimaliwa ashihe shoomiliona N$12 osha longithwapo inaapa thigala sha.
MuApilili nuumvo minista gwiikwameni, omayendathano negameno Albert Kawana okwa li a patulula einda lyOnhuno Police Checkpoint lya fa ndika, lya tungwa koomiliona N$ 8, naakwashigwana oya li ya yembe elongitho lyoshimaliwa shoka.
Aakwashigwana oyendji oya li ye wete anuwa oomiliona ndhoka dha longithwa ondjindji nai oshoka etala owala lyomuzile lya tungwa miipeleki, ombelewa yopolisi osho wo uundjugo waapolisi naakwashigwana, ngaashi naana ndyoka opo lya patululwa.
Shikongo ta ti ohashi kala oshiwinayi komahupilo goshilongo, aakwashigwana osho wo okutula aapolisi monkalo yoshiponga ngele taya longele pomahala inaga gamenwa, sho osho taya ningi oonkambadhala okumona kutya onkalo moka aapolisi taya longele oyi li hwepo, kaaya kanithe oomwenyo molwoomvule nenge omutenya.
“Shoka tashi yemateke ooshoka kutya pehala mpaka opwa kanithile aapolisi yaali oomwenyo manga ya li miilongo gumwe mo 2011 manga omukwawo a hulithile mo2017,” Shikongo ta ti.
Shikongo okwa ti osha li sha simana opo pu tulwe etungilo peinda lyopolisi opo aapolisi ya vule okutula po elandulathano ngele tashi ya kiiyenditho yomoondjila noopate osho wo okukwashilipaleka kutya oongangala itadhi longitha iihauto muulingilingi.
“Egameno lyomooondjila oshinima shoka shi na esimano lyomeendelelo, kehe omukwashigwana moshilongo oku na uuthemba wokukala u uvite kutya oku li megameno uuna ta ende ethimbo kehe ina limbililwa kutya ope na ngoka ta vulu oku mu ningila omiyonena,” omukuluntu gopolisi ta ti. Okwa indile aakwashigwana ya longele kumwe nopolisi okukondjitha iimbuluma, unene tuu okulonga nokwiikaleka kokule noonganga ndhoka aantu haya siikilile momagumbo.
“Natu longeleni kumwe nokukwashilipaleka kutya opolisi otayi longo iillonga yawo, melongelokumwe otatu vulu okukandula po omaudhigu ogendji,” Shikongo a dhenge omuthindo.
Ta ti otaya ka kwashilipaleka kutya omainda agehe moshilongo otaga ka tungwa pamuthika ngoka moshilongo, naandyoka tali ka tungwa ngashiongeyi ondyoka lyi li pokati kOkahandja noWindhoek.
Omukuluntu gopolisi moshitopolwa shaShana komufala Naftal Lungameni Sakaria okwa ti oku uvite a hwepopaleka iilonga kumwe naapolisi yomoshitopolwa she sho eyinda ndyoka lya patululwa.
Ta ti otashi ka shunitha pevi omiyonena dha kehe siku mbyoka kwa li hadhi ningilwa aapolisi molwegameno kaalyi li nawa pomahala gomainda sho inaaga tungwa nawa.
Kakukutu omukulu gwetanga lyopolisi e li moshipundi shevululuko Sebastian Ndeitunga okwa ti aapolisi naya longe iilonga mbyoka ya ganena, inaya kala ashike taya longele oondjambi. Ta gwedha ko ta ti aakwashigwana naya simaneke aapolisi nesimano lyiilonga yawo moshigwana.