Osikola yedhina Dagbreek koWindhoek, otayi indile oshigwana, shi fale uunona mboka wu na uunyengwi wopamadhiladhilo opo ya tale ngele otaya monenwa omahala.
Oya indile aanona ye na omimvo okuza 16 sigo 20, ye li momagumbo noye li mompumbwe yosikola, ya thike posikola Dagbreek.
Osikolaoyapitithaomushangwa kutya oya hala wo okulongitha ompito ndjoka okumona kutya aanona yangapi ye li mompumbwe yoosikola hadhi gandja enongelo kaanona ye na uunyengwi wopamadhiladhilo.
“Osikola yetu ohayi gandja omalongo miimpungu ngaashi, okuninga oondhopi, okupanda, okuthaneka, uunamapya oshowo iiyetwapo yilwe yokoonyala,’’ ya yelitha ngaaka.
Osikola oya ti, kuuyelele wa gwedhwa po, naku dhengwe konomola 081 288 9158.
Omulukuntusikola posikola yaanona ye na uunyengwi wopamadhiladhilo yedhina Eluwa Special School mOngwediva, Koluumba Niironda Nangombe okwa ti, aanona ye na uunyengwi wopamadhiladhilo oya pumbwa koosikola opo ya ka mone uunongo wulwe opo ya ka vule okulonga sha kuyo yene, ngaashi okupanda, okutunga oshowo kehe shoka taya vulu okweeta po noonyala dhawo.
“Aalongwa yamwe oye ya posikola yetu kaaye shi okushanga nenge okulonga sha noonyala dhawo, ihe nena otaya longo oshindji,’’ ta hokolola ngaaka.
Uuministeli welongo owa ti owa ndhindhilike ompumbwe yaanona ye na uunyengwi wopamadhiladhilo.
“Otu na ashike oosikola ndatu moshilongo dhaanona ye na uunyengwi wopadhiladhilo, mbali koshitopolwa shaKhomas oshowo yimwe mOshana,’’ uuminsteli wa ti ngaaka.
Tau gwedha po kutya otau kambandhala okugwedhela po oosikola ndhoka ndatu iilongitho okuyayambidhidha miimpungu mbyoka yi li poosikola ndhoka nale. Owa tseyitha wo kutya oya tengeneka okutunga oosikola dhi li hamano miitopolwa ngaashi Kavango gwokuuzilo, Hardap, Omaheke, Ohangwena, Kunene oshowo Khomas.
“Oosikola ndhoka otadhi ka tungwa nomayambidhidho giilongithomwa ayihe tayi ka pumbimbiwa okuyambidhidha aalongwa mboka ye na uunkundi wopamadhiladhilo,’’ wa fatulula ngaaka. Owa ti, nonando ya taalela eshongo lyoosikola yaanona ye na uunyengwi wopamadhiladhilo, mboka ye na uulema womeho oshowo womakutsi oye na oosikola dha gwana.
-vkaapanda@nepc.com.na