Nonando MTC taka gandja ompito yesilohenda kwaamboka inaaya ndhindhilikitha uukalata wa wo oomwendhi ndatu, uukalata mboka otau kala wa tetwa mo mombepo.
Ndhoka okwali dha po piwa komunambelewapitithi omukuluntu mehangano lyoMtc, John Ekongo, sho kwali ta kumagidha oshigwana shiyambindhidhathane, oku ndhindhilikitha mboka yaana ongondhi ha dhiyi komalungula. “Okuna ashike omasiku gaali opo okundhilikitha kuukalata ku hule, na kehe ngoka taka ndopa okushininga momasiku ngoka, okakalata ke ota tu ka kutha mo mombepo,” Ekongo ta fatulula ngaaka. Ta ti, ngoka taka longitha ompito yoomwendhi ndhoka ndatu dhesilohenda, ongondhi ye otayi ka shunwa mombepo ethimbo ndyoka. Ihe ngoka taka ndopa okundhindhilikitha okakalata ke moomwendhi ndhoka ndatu, opena ompito onene okukanitha onomola ye.
“Kehe ngoka ta vulu okuyambindhindha mboka yaana oongondhi hadhi yi komalungula neshi ninge, ihe inaya pula aantu oshimaliwa sho futo,” ta ti ngaaka. Ekongo okwa ti, oya lopotelwa yamwe taya pula aantu oofuto opo ye ya kwathela.
Okwa kumagidha wo mboka yaana aayambindhindhi yathike ashike pomahala mpoka tapu ndhindhilikilwa uukalata.
“Otwa ningi ethimbo ta tu kumagidha oshigwana shi ndhindhilike uukalata wa wo omanga kuna ethimbo,” ta popi ngaaka.
Minista gwomauyelele nomakwatathano gopaungomba Emma Theofelus, oshiwike sha ziko, okwali a pititha omushangwa kutya, omasiku goku shangitha uukala woMtc itaga gwendhelwa we.
Esiku lyahugunina okushangitha uukala, omasiku 31 gaMalitsa nuumvo sho ga ningi ethimbo taga gwedhelwa okuza omumvo gwayi.
“Kehe ngoka taka kala inaa shangitha okakalata ke, otaka kala oomwendhi ndatu ka tetwa mo mombepo,” ta fatulula ngaaka okupitila kepandja lyuuministeli womakwatathano.
Ta gwedha po ta ti, kehe ngoka taka kambadhala okulongitha oka kalata hoka inaaka ndhindhilikwa, otaka kala ta mono etumwalaka okuza koMtc.
Theofelus ota kumagidha oshigwana shi longithe ethimbo ndyoka lya hupa ko opo kehe gumwe a kale a shangitha okakalata ke.
-vkaapanda@nepc.com.na