Auleria Wakudumo
Elelo lodoolopa yaWalvis Bay ola dika eetenda mbali dakula okukwafela pakafimbo ovanhu ava va ninga oihakanwa yomundilo. Ovakwashiwana ova teelelwa va kale monhele omo fiyo 11 Kotoba 2024 manga tava kongo omakwafo okumona omalukalwa amwe.
Ovakwashiwana ova pewa yo omatalashe, oikumbafa noilikwafifo imwe ya wedwa po, va pewa ko Round Table. Twaloloka Aid Support and Kindness naye okwa kwafela okuyandja omakwafo avo nokombifa yoikulya.
Elelo lodoolopa ola ti eshi la popya novakwashiwana ava va pilwa eebashu, ova mona kutya ovanhu va fika 70 kave shi Ovanamibia. Elelo ola weda po kutya oovene veebashu dihapu odo da pya vati ove na omaumbo amwe moWalvis Bay navamwe vati ove na omaumbo kondje yoWalvis Bay.
Molwoshinima osho, elelo ola ti otali ka tula moilonga exulifepo lelikufilo ledu moWalvis Bay shaashi nalo oli li vati tali weda ko kepyo leebashu nekanifo leemwenyo dovakwashiwana.
Elelo ola ti otali ka kwatafana nouministeli woikwameni opo li mone kutya otali ka kwafela ngahelipi ovanhu ovo vehe na omaufemba. “Omitima detu odi li pamwe nakeshe umwe a ninga oshihakanwa shomundilo. Elelo otali twikile okuninga eenghendabala di lili noku lili opo li kwafele ovakwanedimo ovo va kanifa omaliko avo momundilo,” elelo tali ti.
Omupopiliko wopolifi mErongo, Warrant Officer Tashiya Tuyenikelao okwa ti nonande omundilo wa xwika po eebashu dihapu, ookadimamundilo ove shi pondola okudima omundilo ashike ove litwa omudimba womulumenhu a pya komundilo oo kwa li ita dulu okudimbululwa pefimbo opo. Ovakwapata vomulumenhu oo inava shivifilwa natango shaashi navo inava shivika natango.