Auleria Wakudumo
Oshikondo shehongo moshitukulwa shaShana osha yandja omapapa kovanhu va lesha nawa omambo meengulumambo dayooloka moshitukulwa, momukokomoko womudo 2024.
Ava ova pewa omapapa etumbaleko koshivilo shali ko mEtitano, shoku tumbaleka ovo va longa nawa noshikondo shelongo moshitukulwa.
Ovaleshi dingi ovali va tukulwa meengudu da yooloka, da kwatela mo ovakulupe, ovanyasha nounona.
Keshe ongudu oya yandja omapapa kovaleshi dingi vatatu.
Omuleshi dingi mongudu younona oAngel Abner oo ina dula okuholoka pefimbo loshitufi okwa lesha oumbo 68 mongulumambo yUukwangula. Basilia Haufiku (10) oo e li mondodo onhine pEhenye Primary School mOshakati, okwa pewa epapa onga omuleshi mutivali dingi moshitukulwa shaShana eshi a lesha oumbo 67 odula yadjako.
Haufiku okwa holola ta ti oha talele po ongulumambo yaShakati oikando ihapu. Okwa ti okuya kongulumambo nokulesha oha mu pe ounongo muhapu nohashu mu kwafa yoo okuninga oifiilwalonga yaye yofikola oyo e na oku ka ningiola keumbo.
“Okambo kange aka di hole dingi muvakwao, “Oudhano womvula”. Aka otaka popi ashike kombinga younona tava dana modula nonghene va pewa omakumaido kovakulunhu opo vaha danene vali omeva” Haufiku ta ti.
Haufiku okwa indila ovanafikola vakwao unene ava vepipi laye opo va kale nokutalela po eengulumambo va likole mo ounongo oo tava dulu okulongifa momalihongo avo.
Omanga ovakulupe navo va pewa omapapa eshi va kala nokulesha oumbo va yooloka momukokomoko wodula ya ya.
Omuleshi dingi mongudu yovakulupe, Anika Van Zyl okwa lesha oumbo 87, Annel Van Zyl a lesha oumbo 84 omanga Daniel Indongo a pewa epapa eshi eya ponomola oninhatu mokulesha oumbo mongudu yovakulupe.
Dingi moshilongo
Oshikondo shehongo mOshana osha yandja yo omapapa kovahongwa novahongi dingi moilongwa ya yooloka.
Oshikondo osha yandja omapapa kovahongwa dingi omulongo mondodo 11 oshoyo oAdvanced Subsidiary (AS) mo2024.
Omuhongwa dingi moshilongo ashishe Maria Nhinda, omuhongwa kofikola yaAndiba Toivo ya Toivo mOndangwa okwa pewa yo epapa eshi eya ponomola oninhatu moshilongo moMathematics odula ya djako.
Omanga Naomi Shakungu, omuhongwa womoGabriel Taapopi a pewa epapa eshi oye katokote moshilongo ashishe moAccounting odula ya djako mekonaakono la xuuninwa.
Shakungu okwa pewa yo epapa eshi eya mutivali moshilongo ashishe moEconomic.
Shakungu okwa li a kwatela ongudu yoshilongo yeemhata hano oNational Debate mo2024 eshi kwali va ya koBotwsana. Shakungu okuli yo oshilyo shomutumba wopashiwana shounona. Selesite Kanyanye, omuhongwa womoGabriel Taapopi a pewa epapa eshi eya wotete moMathematics moshilongo oshoyo moshitukulwa shaShana.
Kanyanye okwa pewa yo epapa eshi eya ponomola 10 moBiology oshoyo ponomola 25 moPhysical Science.