Opolifi moshitukulwa shaMaheke oya patulula oshibofa shenyekeko ledu la ningwa kovanhu ovo vati ve likufila ofaalama yedina Witsand i li komudingoko waGobabis mexuliloshivike.
Ofaalama ei oi li koshi youministeli wounamapya, omeva nomatululo omadu.
Ouvideo tava tambulafanwa komalungula ova ulika nghee ovanhu ava va yelulila oimuna yavo mofaalama tava ti otave shi ningi shaashi ihava pewa eefaalama domatulululo, nande ova ninge omaindilo.
“Ita tu di mo omu, natu ye ni ashike kohofa,” umwe womuvo ta ti.
Omukulunhu wopolifi moshitukulwa shaMaheke Commissioner Andreas Haingura okwa hokolola ongudu yovakulunhu nounona va londeka oimuna yavo mololi nomeetuwa deebaki noku ya mofaalama yepangelo.
Opolifi oya hokolola ti ongudu yovanhu ova lombwela omukeli womaliko kwa li ta longele pofaalama opo kutya ova hala okulifa oimuna yavo meni lofaalama.
Omukeleli womaliko pofaalama opo vati okwa kendabala ok uva ya moshipala, ashike ova tameka okutanguna noku ninga omatilifo kutya otava tete odalate ngeenge ina hala okupatulula po.
Opolifi oya hokololwa tai ti ovanhu ave oshipondola okuteya po ekumba pomuvelo wofaalama nokutula oimuna yavo ngaashi oikombo, eengobe needi.
Ovalombwela omukeleli womaliko kutya otava ka lifa oimuna yavo mofaalama oule weemwedi mbali.
Okudja opo ovanhu ova dika eetenda davo dokunangala, va twalela omakumbafa noikulya.
Ota ku hokololwa kutya opolifi okwa li ya fika pofaalama opo ashike ka pena oshiponga sha lopotwa pokati kovanhu nomukeleli womaliko.
Fiyo opapa ovanhu ovo omo veli mofaalama omo noimuna yavo.
Minista womeva, edu netululo lomadu Calle Schlettwein okwa ti ka shi li mondjila oku li kufila edu pehe na epitikilo.
Okwa ti ovanhu ova ninga epuko eshi va twala oimuna yavo kofaalama yepangelo ina va pewa epitikilo.
“Ove na okukatukilwa onghatu yopaveta shaashi kave na oufemba wokuya kofaalama yepangelo. Ofaalama ei omaliko epangelo,” ta ti.