Opolisi moshitopolwa shaShana otayi ka gandja ompito kooyene yoongeshefa dhomanwino opo ya landithe omasiku agehe, pethimbo lyomatango omanene.
Opolisi okwali ya popi ngaaka esiku kwali ya tameke okutula po omalandulathano gomoondjila, omolwa ethimbo lya taalelwa.
Omahala gomanwino oga kala haga patwa esiku lyokili, esiku lyaakwanezimo oshowo lyomumvo omupe. Omukuluntu gwopolisi moshitopolwa shaShana Naftal Sakaria okwa ti nonando ya gandja ompito ndyoka yoku landitha iikolitha, kehe ngoka taka adhika ta hingi e li kohi yondhungo otaka kala mokakumo ethimbolyo kili.
“Opolisi oya ti itayi ka longa nuudhigu naamboka itaya ka gwanitha po oompango dha tulwa po, oshoka aalumentu naakiintu yeli momizalo otaya ka longa ashike iilonga yawo,’’ ta popi ngaaka.
Ta ti, pethimbo lyomatango omanene, Aanamibia oyendji ohaya kanitha oomwenyo dhawo miiponga yiihauto nomadhipagathano, niimbuluma yilwe ohayi indjipala.
Okwa kumagidha oshigwana ta ti, aayenda nandjila taya katalela po aakwanezimo ya wo kiitopolwa ya yooloka, naya longithe nawa omandhidhiliko gomoondjila okuyanda iiponga hayi holoka unene pethimbo ndika lyokili.
Sakaria okwa kumagidha, aahingi kaaya hingilile, namboka haye shi ningi opo kaaye shi ninge we, yo yaaha hinge ye li kohi yo maluvu nenge ya vulwa.
“Omimvo dha pi ti, pethimbo ndika lyomatango omanene, oyendji oya kanithile mo oomwenyo dhawo, ihe olwindji ohashi holoka ko kwaalandula omadhidhiliko gwoomondjila,” ta ti ngaaka.
Ta ti, omolwa egameno lyoomwenyo dha humbatwa, oshowo dhaahingi yalwe, aahingi ayehe naya kale ye na oshinakugwanitha shoku simanekeni omandhindhiliko gomoondjila.
Sakaria okwa ti, oshitopolwa shaShana osha ilongekidha okulwitha iimbuluma pethimbo ndika, onkene itaya ka pitika nando omuntu taka konda nenge taka teya oompango adhihe dhatulwa po.
“Ngele oshigwana osha landula oompango adhihe dha tulwa po, nena ka pena nando uuwinayi washa tau holoka. Ethimbo ndika olyokunyanyukwa ihe kali shi lyokukala momaluhodhi,” ta kumagidha ngaaka.
Opolisi yaNamibia okupitila miikundaneki ya yooloka oya kumagidha wo aahingi yi hauto, ya hinge nuukeka yo ya gwanitha po oompango dhomoopate.
Ta yiti, uuna oshiponga sha holoka mondjila aantu naya dhenge konomola yopolisi 10111 nenge MVA 0819682.
Natango oya kumagidha oshigwana shi kale sha kotoka, oshoka ethimbo ndika aafuthi oya tegamena okuteya omagumbo omanga oyene taya ka talela po kiitopolwa yimwe.
– vkaapanda@nepc.com.na