Okwa konekwa oondjamba tadhi indjipala shinene moNamibia okuza momumvo 1995.
Nuumvo okwayalulwa oondjamba dha indjipala moNamibia alihe, okuza pomwaalu 7 500 ihe nena odhili 23 736.
Ndhoka odha popiwa kuMinista gwomundhingoloko, omakuti, nomataalelepo Pohamba Shifeta, esiku kwali ya eta puuyelele noku fatulula etengenekothaneko lyokukondolola onkalo yiiyamakuti ooshowo omilandu dho mahala giiyamakuti ga gamenwa. Esiku ndyoka natango uuministeli womindhingoloko okwali wa gandja iilongitho kaakeleli yiiyamakuti mehala lya gamenwa, Bwabwata. “Oondjamba inadhi indjipala ashike momwaalu, ihe odhayi natango ko mahala gamwe moshilongo,” ta ti ngaaka.
Shifeta okwati, okwa ndhindhilike kutya oondjamba odhali dha indjipala okuza mo2012, sho ondjala ya li ya holoka, shoka kwali sha thiminike oondjamba dhi kathike ko mahala inaadhi pitikwa.
Minista okwali a fatulula noku eta puuwayele nkene ehala ndyoka Bwabwata lyina okuhuma komeho oshowo okukondolola onkalo yoondjamba mehala moka.
Ta popi ta ti, oshayela kutya egameno lyomahala oshowo lyiiyamakuti tayi kondololwa olya gwedhako koondjamba tadhi indjipala oshowo tadhi tembukile ko mahala galwe. “Shoka osha tulwa miilonga, konima kwali sha tengenekwa momumvo 2019. Etokolo ndyoka okwali lya tulwa miilonga sho aanafalama, ooministeli dha yooloka, aakwashigwana oshowo omahala gena oondjamba ya li ya gandja omanene ndhilandhilo gawo,” ta fatulula ngaaka.
Ta ti, etengenekothaneko lyokukondolola omahala gena oondjamba moNamibia alihe, olya umbatwa ko manene ndhilandhilo giilyo ya yooloka, shoka tashi ka xwaxwameke ehumokomeho lyomahala ngoka.
“Uministeli womundhingoloko otau kala tau kandulapo omaupyakadhi taga adha aakeleli yo mahala ga gamenwa,” ta fatulula.
Shifeta okwati, oya landa oomatalashe geli 500 oshowo oofiliza dhili 13, mbyoka tayi ka gandjwa kaakeleli yo mahala ga gamwena koBwabwata, Etosha oshowo Palmwag koshitopolwa shaKunene.
Ta ti, natango momasiku omahupi otaya ka topolelwa ootoshe, ootenda oshowo oodhalate dho kuigmena kiiyamakuti.
– vkaapanda@nepc.com.na