ONGWEDIVA – Oondoolopa monooli odha tameka dhu udha aatalelipo, mboka ya hilwa komauliko giipindi gOngwediva ngoka taga tameke ngula mEtitano sigo omesiku 01 Sepetemba.
Ngaashi onkalondjiigilile, omauliko giipindi ngoka gokomumvo ohaga gongaleke oyendji okuza kiitopolwa ya yooloka oshowo okuza kondje yoshilongo.
Oondoolopa Ondangwa, Oshakati oshowo Ongwediva odha tameke okuudha mehuliloshiwike, nomahala gokuza pakathimbo ogu udha aatalelipo.
Omupopiliko melelo lyondoolopa yaNgwediva Jackson Muma okwa ti, omauliko giipindi otaga ka ningwa nesimaneko noompango nomalandulathano, okuza esiku lyotango sigo olyahugunina nelalakano lyokweenditha iipindi mbyoka nawa.
“Elalakano lyetu, okugalula eliko lyoshimaliwa, ndyoka lya gu pevi oshowo okugalula oongeshefa ndhoka dha li dha kanitha oondjila dhawo omimvo dha piti,” Muma ta ti ngaaka. Ta ti, omawuliko giipindi gomOngwediva, ompito ombwaanawa kaanangeshefa oshowo komahangano ga yooloka, okuulika uunongo niilonga oshowo okushingitha iilandandithomwa yawo.
Omawuliko giipindi mOngwediva okwa li ga patuluka lwotango momumvo 2000, nonuumvo oge li kohi yoshipalanyolo “Okugalula eliko oshowo okugandja ompito yomauliko giipindi”.
“Iipindi mbyoka ohayi gongaleke aanangeshefa oshowo aantu ya za kokule, taya ulikilathana uunongo niilonga yawo mehala limwe,” ta popi ngaaka.
Muma okwa ti, nuumvo oya tengeneka okukala ye na aawuliki yiipindi ye vule 250 okuza koombinga noombinga oshowo taya zi kondje yoshilongo.
Ta ti elalakano okugandja ompito kaanangeshefa oshowo komahangano ga ulike iishingithomwa yawo oshowo okugalulila eliko mondoolopa yaNgwediva oshowo moshilongo ashihe.
Omawuliko giipindi otaga ka ulika iilandithomwa ayihe okuza kiikulya, kiizalomwa na kehe shoka hashi vulu okweetwa po noonyala oshowo okweeta oombelewa hadhi gandja omayakulo ga pumba popepi. Muma okwa ti, omawuliko giipindi gonuumvo otaga ka kala ga yooloka komakwawo, oshoka otaga ka gandja wo ompito natango nolkaanangeshefa mboka itaya vulu okuthika.
“Omauliko giipindi gonuumvo otaga ka kala ga yooloka komakwawo oshoka otwa longekidha oyindji iiwanawa ya yooloka kwaambyoka ya holoka nale,” ta popi ngaaka.
Omayindilo okumona ompito yokuulika iipindi mOngwediva otaga nena mEtine, nongashiingeyi elelo olyi li metifa okulongekidha oshiindingili shoka.
– vkaapanda@nepc.com.n