ONAYENA – Oondohotola 10 dhAanamibia dhopaunamiti dhoka opo dha mana eilongo lyadho otadhi tameke okulonga moshikondo shUukalinawa, osho Ominista yUundjolowele Richard Kamwi a ti poshigongi omasiku ga zi ko noshigwana mOnayena. Mokuyamukula komapulo kombinga yompumbwe yomundohotola pEndiki lyUukalinawa pOnayena, minista okwa ti onkundana ombwanawa otayi ka dhika moshigwana shika muule womasiku omashona gowala. “Ondi uvite uuntsa okutseyitha kutya oshiwike tashi ya otandi ka yakula oondohotola dhopaunamiti dhAanamibia ye li omulongo. Oshi li oshitopolwa shondungethaneko yetu okutuma kehe omvula aailongi 30 komadheulo gopaunamiti koSouth Africa oshowo iilongo yilwe,” Kamwi ta ti. Pethimbo ndika, Epangelo olya ligamena kiilongo yopaukuume ngaashi Cuba oshowo yilwe mbyoka hayi tumu oondohotola naanambelewa yopaunamiti okuyakula oshigwana shaNamibia. Okwiindile aavali ya kumeke aanona yawo ya kuthe iilongwa ngaashi omwaalu nuungongononi opo ya vule okudheulilwa uunamiti. “Onda hala okweeta po ethaneko andola oshitopolwa kehe shi kale shi na aailongi yuundohotola yaali. Oshinima shika andola nashi ningwe wo kaalongwa yomadheulo guupangi. Konena, ope na oproholoma yomadheulo gaapangi 300 omvula kehe mOshakati, Rundu, Otjiwarongo, Keetmashoop nOvenduka. Oshitopolwa kehe nashi kuthe andola ombinga moproholama ndjika hayi futilwa kEpangelo,” osho Kamwi ta indile. Ominista oya holola etegameno lyayo kutya omadheulo guupangi otaga ka hwepopaleka ompumbwe yaapangi moNamibia, ndjoka yi li eshongo lya dhiginina lya taalela uuministeli we. Oshigwana mpoka osha indile pu gwedhwe okaklinika pElombe, hoka ka kala nokupopiwa ethimbo ele. Kombinga yepulo ndika, okwa ti ethaneko lyokapangelona pElombe opo li li natango, ihe otapu ningwa omakonakono tango ku talike ngele opwa gwana shili okutungwa endiki ndika lyopaundjolowele. “Omwa pumbwa ashike okwiidhidhimika shi nasha nokaklinika kopElombe. Omukuluntuwiliki gUukalinawa ota gandja mbala omushangwahokololo gwe mbala kune,” osho minista a uvaneke. Omuviyauki gomoshigwana goSwapo moshikandjohogololo Onayena, Quito Mulunga okwa pupula kombunda ominista omolweitulomo lye okuyakula oshigwana she. Kakele komaupyakadhi ngoka ga holokele po shi nasha nolweendo lwondhila, Mulunga okwa ti, minista ina shuna omutse miipeta. Peha lyokusholola, okwiiyamba okuhinga e ye kOnayena nando a tseyithilwa muule wethimbo efupi e ye okupopitha oshigwana kombinga yuupyakadhi washo. “Aantu yoonkatu ngaashi ndjika, andola oya gandja ashike ombili kutya opwa holoka uupyakadhi wondhila, ihe ye ine shi ninga oshoka oku na eitulomo okuyakula oshigwana,” Mulunga osho a pandula ominista.