Paulina Ndalikokule
Oshikondo shomayakulo giinamwenyo muuministeli wuunamapya, omeya netendululo lyevi osha tseyitha kutya otashi ka pitika ishewe opo iikwamawawa tayi zi koSouth Africa yi tameke ishewe okuya moNamibia.
Omukuluntu gwoshikondo shoka, Albertina Shilongo, metseyitho lyopambelewa okwa ti, Namibia okwa ningi etokolo a pitike South Africa a tameke ishewe okulanditha onyama yiikwamawawa mbyoka owala ya za moofalama dha gamenwa, dho odha uthwa koshikando shomayakulo giimamwenyo moshilongo moka.
“Nashi tseyike ngeyi kutya onyama ndjoka tayi ka pitikwa moNamibia oondjoka owala ya za kiikwamawawa ya za moofaalama dha gamenwa dhi li melandulathano lyombelewa yoshikondo shomayakulo giinamwenyo,” a ti.
Oofaalama dhino ohadhi kala dhi li kohi yegameno enene lyomayakulo giinamwenyo shoka hashi kwathele okukaleka kokule etaandelo lyomikithi.
Shilongo okwa tseyithile ekaleko lyokulanditha onyama yiikwamawawa okuza koSouth Africa omuvo gwa za ko, konima sho omukithi gwiikwamawawa oHPAI gwa tukulukile moshilongo shoka.
Etokolo ndyoka olya li lya pumbiwa unene noonkondo opo Namibia i igamene ketukuluko lyomukithi ngoka miikwamawawa mbyoka yi li moshilongo shika.
Iikwamawawa yi na omwenyo, onyama yayo, niilongithoma noshowo uudhila awuhe owa li wa ngambekwa okulanditha molweendelelo lyetaandelo lyomukithi ngoka.
Namibia oha landa woo iikwamawawa kiilongo yaEuropa nokoSouth America.
Shilongo ota indile mboka taya pumbwa uuyelele wa gwedha po opo ya talele po ombelewa yawo.
-ndalikokulep@gmail.com