ONGWEDIVA – Konima sho ooministambali dhiikwameni, etonatelo lyokoongamba negameno dhaNamibia naZambia dha li dha ningi oshigongi kombinga yoongamba pokati kiilongo mbika iyali, odha li dha tokola kutya oongamba dhokoKatima Mulilo otadhi kala tadhi longo ethimbo alihe. Shoka osha li sha tokolwa, sho kwa li kwa ningwa tango omutumba okukundathana omauwanawa gokukala noongamba dhokoKatima Mulilo dha eguluka ethimbo alihe, ano itaadhi pata.
Omayinyengo ngoka goowili 24 pokati kaNamibia naZambia oga li ga tokolwa koominista dhiikwameni, etonatelo lyokoongamba negameno Albert Kawana naJack Jackob Mwiimbu, Sha ikwatelela komushangwa gwa pitithwa kuuministeli wiikwameni, etonatelo lyokoongamba negameno, owa totha mo kutya shoka osha tokolwa sha ikolelela komauwanawa ga taalela iilongo ayihe iyali, moka mwa kwatelwa ekoko lyoshimaliwa. Natango omwa shangwa kutya aanangeshefa oya manguluka okuninga oongeshefa dhawo ethimbo kehe, yaa na we omalimbililo goowili dhokupata oongamba koKatima Mulilo. Kawana okwa li a ningile oshigongi aakalimo yokoKatima Mulilo, nokwe ya kumagidha yi ikaleke kokule niimbuluma oshowo kehe shoka inaashi yuthwa poongamba. “Eyinyengo lyethimbo kehe itali ti iimbuluma nayi longwe, ihe okugandja ompito kaanangeshefa oshowo aakalimo yomiilongo ayihe iyali ya longe, opo oongeshefa dhawo dhi hume komeho nopethimbo,” ta fatulula ngaaka.
Esiku ndyoka Kawana okwa li a pandula oomeme nootate ye li miikutu yetanga lyegameno mboka taya iyamba, noshimaliwa N$10 000, nooshako dhuusila 20, ongolupandu, sho taya longo nuudhiginini okukeelela iimbuluma. Minista natango okwa li a fatulula kutya shika natango okwa li ye shi ningi nelalakano lyokunkondopaleka uumwayinathana pokati kiilongo mbika iyali.“Uuna iilongo tayi longele kumwe, ohapu kala ohole nombili ombwaanawa, oshowo ekoko lyoshimaliwa,’’ ta fatulula ngaaka. Pethimbo oongamba ndhika kwa li dha patululwa sigo aluhe pambelwa, okwa li kwa gongalwa wo kaanenentu ya yooloka okuza koombinga adhihe mbali dhiilongo, Namibia naZambia.
vkaapanda@nepc.com.na