Paulina Ndalikokule
Sho Omupanguli Petrus Unengu nokakomisi ke taya talele po iitopolwa, oongoloneya oyendji naakalimo miitopolwa yawo, onkene taya tsikile nokuninga omathaneko gomatendululo.
Iitipolwa ya talelwa po momasiku omatalala oshaShana nOmusati, hoka Ngoloneya gwaShana Elia Irimari mEtitano a gandja omathaneko gokutendulula nokugwedha po iikandjohogololo yi li itatu moshitopolwa she.
Irimari okwa hala pu tulwe oshikandjohogololo oshipe mOngwediva shi kale tashi yakula aakalimo yomondoolopa, sho oshikandjohogololo shoka shili po ngashingeyi shi lukululwe Onamutai. Oshikandjohogololo oshipe mOshakati tashi kala tashi ithanwa Oshakati shomondoolopa.
Ota ti oshikandjohogololo Okaku nashi topolwe miitopolwa iyali yombelewa ompe tayi kala komukunda Iilagati.
KOmusati, Ngoloneya Erginus Endjala okwa ti opo ye li moshigongi shokukundathana omathaneko ngoka naakwashigwana.
“Otatu ka pulakena ashike sho taya ti tse tu gandje omathaneko getu ngele twa uvu omatheneko gokangundu komatendululo,” a ti ngaaka.
Ngoloneya gwaHangwena Sebastian Ndeitunga okwa ti inaya adha natango etsokumwe ngele otaya ka pumbwa okutopola Ohangwena miitopolwa iyali nonando sha kala sha tseyika kutya omu na aantu oyendji nomayakulo inaga gwana.
“Ompango otayi ti oshitopolwa nashi kale ashike niikandjohogololo ngele iishona ihamano nangele oyindji nayi kale 12. Ohangwena oyi na aantu oyendji, ashike iitopolwa mbyoka tu na ngashingeyi oyi li nale 12,” ta ti. Okwa ti shoka taya vulu okuninga okugwedha iikandjohogololo pomikunda dhoka dhi li kokule nomayakulo.
Ta ti ookansela naya ninge omapekapeko ga gwana okuza koshigwana opo ya vul e okugandja omathaneko. Oshigongi shetendululo lyoongamba netopolo lyoshitopolwa osha li mOhangwena iiwike ya piti.
Oshikoto aakalimo oya hala sha topolwa miitopolwa iyali – Oshikoto West nOshikoto East. Oya pula andola koshitopolwa shaShikoto shoka shi li po, Ohangwena nOshana ku ze iinkandjohogololo yimwe yi ninge po Oshitopolwa shOshikoto West.
Kavango ngoka a topolelwe mo 2013 a ningi Kavango East naKavango West, Kavango East okwa hala okugwedhwa yininge iikandjohogololo 20, omanga Zambezi a hala a lukululwe a ninge Caprivi Region, ye a gedhelwe nokukuthwa iikandjohogololo yimwe.
-ndalikokule@gmail.com