Oongoloneya yiitopolwa ayihe moshilongo oya gwedhelwa ko oomwedhi ndatu komeho mombelewa. 

Iilonga yawo okwa li yi na okuhula pambelewa momasiku 20 gaMaalitsa nuumvo. 

Omauliko goongoloneya ohaga ningwa konima yomimvo ntano komupresidente gwoshilongo, ha totha mo mboka a hala okulonga nayo. 

Momushangwa gwa shayinwa komupresidente omukulu Nangolo Mbumba, gwa gandjwa koongoloneya dhiitopolwa, okwa gandja epitikilo ya tsikile iilonga sigo omuJuni nuumvo. 

Shoka osha ningwa anuwa okugandja ompito komupresidente omupe Netumbo Nandi-Ndaitwah ngoka a yi koshipundi momasiku 21 gaMaalitsa nuumvo, a hogolole oongoloneya ta ka longa naye. 

Kape na uuyelele natango ngele mboka ye li ko otaya zi ko nenge otaya tsikile iilonga. 

Nonando ookontalaka dhoongoloneya dha pu ko oshiwike sha zi ko, e tadhi gwedhelwa, kape na anuwa shoka tashi lunduluka sigo omwedhi gwaJuni, otaya mono ashike shoka ya kala haya mono komwedhi. 

Oongoloneya dhi li ne, odha tula mo oshifanduko sho dha ningi iilyo yomutumba gwopashigwana. 

Mboka ya thigi po iilonga yuungoloneya oyo Marius Sheya gokoKunene, James Uerikua gwOtjozondjupa, Sirkka Ausiku gokoKavango West osho wo Salomon April gokoHardap. 

Nonando ku na omusholondondo tagu taambathanwa komalungula gomadhina goongoloneya anuwa aape, Kundana ke na natango uuyelele wothaathana ngele oge li mondjila. 

-vkaapanda@nepc.com.na