Windhoek
Oongundu dhompilameno dhoka oonene odha nyanyukilwa etokolo lyaSam Nujoma okukala ina hala we okuhogololwa ongOmupresidende goSwapo pokongressa yopashigwana yongundu ndjoka tayi ka gongala omwedhi tagu ya. Omupresidende goCoD, Ben Ulenga moonkundathana noshifo shika ota ti Nujoma okwa dhana onkandangala onene mopolitika yaNamibia noku na etegameno kutya ota ka pingenwa po pamukalo gopaudemokoli.
Ulenga ota ti osha simana opo uudemokoli wu kale tau pangele momahangano agehe, ndele kashishi ashike moSwapo, molwaashoka ope na aluhe ethimbo aawiliki ye na okulundululwa. Okwe shi ulike kutya ope na omalimbililo momukalo ngoka iinima tayi ungaungwa nayo, molwaashoka Nujoma okwa kala omutse gwongundu tayi pangele omanga Hifikepunye Pohamba e li Omupresidende gOshilongo. “Kakele, Sam Nujoma okwa tseyitha kutya ita ka kutha we ombinga, nondi inekela osho tashi ka kala ngaaka, opo Swapo a vule ngashingeyi okuhuma komeho nokuhogolola omuwiliki paudemokoli. Ondi shishi pehala lyotango kutya oshinima shoSwapo okulonga mo nkene ye na okuhogolola aaleli yawo,” osho Ulenga ta ti.
Omuwiliki goRepublican Party (RP), Henk Mudge, ota ti kutya molwaashoka Nujoma ota ka gandja po ompito yuupresidende woSwapo otashi ka etitha ehulithopo lyoontamana, naashika otashi ka hupitha ethano lyoshilongo kaa li nyate. “Otu na eineekelo Nujoma ita ki idhopa mo opo a ethe Pohamba a longe iilonga ye nemanguluko. Nujoma okwa kala nenwethomo enene naashika osha etitha ethano ewinayi, kashishi ashike moNamibia ndele okuza wo kiilongo yopondje,” Mudge ta ti.
Ta gwedha po kutya Nujoma oshowo yakwawo oya dhana onkandangala onene miita yekondjelomanguluko, onkee ethimbo olya thikana okutaalela onakuyiwa oshoka oshilongo osha adha ondondo yilwe yayooloka lela noonkondo.
Omupresidende goNUDO, elenga enene Kuaima Riruako ota ti mopolotika, aluhe omu na ethimbo lyokuya, ta ti aaleli inaya tegelela ashike ya lombwelwe kutya naya tumbe omitsalo dhawo ya ye. Riruako oku na eineekelo kutya Nujoma shoka a popya osha za shili komutima gwe sho a tseyitha kutya ita ka kutha ombinga mehogololo, molwaashoka itashi ka kala muuwanawa woSwapo ngele okwa tameka “okuumba iikuti”okuza moshipundi shevululuko.
“Julius Nyerere (nakusa omupresidende gwaTanzania a li moshipundi shevululuko) okwa thiga po opolotika, oshowo Nelson Mandela.
Oshi li nawa omuntu a thige po oshipundi omanga ina lombwelwa kutya na ze ko. Ondi shishi kutya shika oshinima shomeni lyongundu yoSwapo,” elenga enene tali ti.
Omupresidende goDTA, Katuutire Kaura okwa nyanyukilwa wo etokolo lyaNujoma okuthiga po oshipundi shuupresidende wongundu yoSwapo. Kaura ota ti otapu ka kala ombili oshowo kutya Nujoma ota ka kala omusimanekwa-kokolipresidende nkoka omuntu to vulu oku ka konga ko omayele, shi vulithe oontamana dhoka hadhi eta ashike omakuyunguto nonkalo yevundakano.