Ompangulilo yopombanda mOshakati oya gandja egeelo lya kwata miiti komulumentu gwoomvula 31 sho a dhipaga uunona wuumwayinagona nokukwata yinakulu koonkondo.
Iilonga mbika yuubalibali okwe yi longele momukunda Okafitu Kakatanyange momundingoloko gwOutapi moshitopolwa
shaMusati.
Otaku hokololwa kutya momasiku 15 Febuluali 2019, Thomas Menas Ifenya okwa li a dhipaga aanona yaali omadhipago omanyanyaleka e ta kwata koonkondo yinakulu.
Ifenya okwa li a itayela mondunda moka mwa li mwa lala yinakulu naanona mboka a dhipaga yomadhina Malakia Ndapuka gwomimvo heyali, naLinus
Ndapuka (10), nokwa dhepagula wo yinakulu ngoka a li e na omimvo 87 pethimbo lyoshiningwanima, omanga inee mu longela iihuna yopaihulo.
Okwa kwatwa po esiku olyo tuu ndyoka.
Sho a holoka mompangulilo ohela, omupanguli Duard Kesslau okwe mu pe egeelo lyonkalamwenyo mondholongo mmolwedhipago lyokanona kehe, oomvula 15 sho a kwata yinakulu koonkondo, noomvula 10 sho a iteyele megumbo nokuyaka.