OSHAKATI – Ehuliloshiwike ndika omaudhano evi to yele. Gamwe gomaudhano ngoka taga ka kala ko omwa kwatelwa ngaka taga landula mpaka.
Ekopi lyaCoca Cola:
Ehuliloshiwike ndika shiti ota ka tekela mbundje muudhano womanyakwa gwoateletika mboka hawu kwashilipalekwa kehangano lyaCoca Cola mOshakati.
Ethigathano ndyoka ekulukulu, noha li nana omanyakwa gwoateletika moshilongo nopuushiinda otali fumbike onkolo ngula konima sho lya li lya tamekele kOmbundu yaKiiyala petameko lyomumvo, lyo tali dhenge ondalaye mOtjiwarongo.
Ethigathano ndika ohali dhingoloka niilando mbika itatu nolweetho lwahugunina otalu dhanwa ongula ndji tayi pi ontaku pokapale kemanguluko.
Omadhina omanene muudhano woateletika oga tegelelwa opo ga ka ninge oshuulilo mpeyaka go omakondombolo taga li nduno ehete ashike itapu ka kala omwali ta tumbu mukwawo, onkene aaholi yomawudhano monooli oombwa dha kwata odheni holokeni pokapale ne mu ka tale nkene oondjumbeta dhoateletika moNamibia t dhi shi iningile.
Uudhano woongonyo:
Aakalimo yOutapi oombwa dha kwata odheni sho Kilimanjaro Boxing te ke mu etela etyapulo lyemanguluko eti-29 nuudhano woongonyo, okuzilila pOmankete Lodge momasiku 20 gaMaalitsa, okuza potundi ontihetatu yokomatango sigo amusha te keeta eembudhi.
Uudhano mbuka owa lukilwa tatekulu Erginus Endjala ngoka e li Ngoloneya gwaMusati, ngoka ta hiya aantu ayehe koombinga noombinga opo ye ye ya mwenyekwe nodhaKahandja mpeyaka pOutapi.
Aambokisi ngaashi Danny Feleciuanu, Kapena Hamutenya, Rafael Iita, Michael Benhard, na Keddy Himalwa oyo yamwe ta ya ka pa aakalimo yomOutapi okatokolahungi kemanguluko siku ndyoka.
Uutekete otau adhika pOshakati Mvula Complex, omanga mOutapi otau adhikwa pOmankete Lodge.
Neymar Junior 5 aside:
Olya ningi natango ethimbo lyokomumvo sho ethigathano lya Neymar Junior lyaadhani yatano kombinga lya nukile mondambo.
Omayishangitho gethigathano ndika oge li metifa nomOshakati ethigathano ndika otali ka kala mo ehuliloshiwike lyomasiku gahamano gaApril onkene oosipana ota dhi indilwa opo dhi kuthe ndimba moombwa dho dhi ki ishangithe manga kuyele dho dhaa ki ilye omutse sho tadhi ka adha omahala ga pwa po.
Aadhani kehe mosipana naya kale ye li pokati komimvo 16-22 nota ku pitikwa ashike aadhani ye li yaali ye na omimvo 25.
Osipana kehe ota yi ki ishangitha noon$500, nomayishangitho oge li ko sigo 31 Maalitsa nuumvo, kuuyelele wa gwedhwa po, out monika konomola 0812595792.
Ethigathano ndika olya tegelelwa wo lyi ka tondoke niilando yilwe moshilongo ngaashi Swakopmund, noWindhoek.
Omuvula ya za ko ethigathano ndika olya li lya sindanwa po kosipana ya za kOshakati ndjoka ya li ya yi komathigathano gahugunina koBrazil, ashike oya li ya huulile muunyengwi oshoka hwiyaka okwa li ku na omandangalati mondjila .
Alex Iitumba oye eli omukwatakanithi gwethigathano ndika monooli noye a li a gandja uuyelele mbuka koshitaafula shomaudhano moshifo shaKundana.
Africa Motto:
Osipana yoAfrica Motto oyi li metifa lyokukonga aadhani mboka ye na iitalenti yokatanga kokoompadhi noye li yi ipyakidhila okutula aadhani mboka koshiyalo nokoshiviha ya tale ngele ota ye ya pe ookondalaka , onkene aamati mboka ye na ehalo naya wayimine osipana ndjika pomayidheulo gawo mOkandjengendi mOshakati.
Africa Motto oku li ti ilongekidhile etameko lyoliha ndjoka a li a shunutha omumvo gwa zi ko konima sho a li a dhengwa kOkahandja Military School.