Charles Ndeumane
ONDANGWA – Oshilyo shopolitburo oshowo ocentral committee yoSwapo Sisa Namandje okwa ti omuulikwa gwomahogololo gopaupresidente gwongundu ta yi pangele yoSWAPO Netumbo Nandi-Ndaitwah oku na ondjokonona yopapolitika ya yela ye oha longo moshili nuuyuuki nomolwaasho aantu ye mu inekela.
Namandje okwa popi ndhoka moshigongi shoSwapo shoka sha li mOndangwa mOlyomakaya.
“Uunake wa uvile Netumbo a tuka omuntu nenge a kutha ombinga moshinima kaa shi li moshili? Netumbo iha kutha ombinga mopolitika ya kaka nondjokonona ye mopolitika oya yela.
Netumbo okwa li omukwaita gwekondjelomanguluko kohi yewiliko lyomundohotola Sam Nujoma nomadhipago oshowo omamono giihuna ngoka ga ningilwa Aanamibia miita yekondjelomanguluko okwe ga imonena yemwene onkene otwe mu inekela a lele oshilongo shika mondjila yu ukilila,” Namandje ta ti. Namandje ngoka naye a li miita yekondjelomanguluko okwa tumbaleke oSwapo molwaasho a mangulula oshilongo oshoka ngashingeyi Aanamibia ota ya vulu noku ilongela kehe omaithano ngoka ya hala
“Swapo okwa mangulula oshilongo ndele eta hanagula po epangelo ndyoka lya li lya thindila Anamibi kongudhi.
Sigo onena Swapo ota hanagula po iinima ayihe mbyoka ya thigwa konima kepangelo lyaatondi. Pethimbo ndiya ka twa li tu na noondjodhi dhoku ilongela omaithano gopondoondo dhopombanda ngaashi uundohotola nenge uuhatoyi,” osho Namandje a popi ngaaka.
Pastoli Nehemia Hangula okwa ekelehi omapopyo nomifofodholo dhaamboka ta ya ti SWAPO okwa kalitha ondjila nokwe ya faathanitha nehokolo lyomombiibeli kombinga ya Absalom ngoka a li a kambadhala oku kutha he omukwaniilwa David koshipundi opo aye ko.
“Shoka osho naanaa ta shi ningwa moNamibia nena. Opu na aantu ta ya ti Swapo okwa kanitha ondjila, anuwa Swapo ondjokonos ashike e na, ya dhimbwa kutya omolwa ondjokonona ndjoka tu li mpaka nena.
Opuna aantu ta ya pop iyi ikolelela kekotampango lyoshilongo ya fa oyo ye li nyola, oya li penis ho ekotampango ta li nyolwa?” Hangula ta ti.