Ehangano lyoRoad Authority (RA) ndjoka hali kalekepo oopate moshilongo olya kwashilipaleke kutya oopate dhoka dha teka po komeya miitopolwa yokonooli otadhi kala dha longwa muule woshiwike shika.
Omukuluntuwiliki waRA Conrod Lutombi sho kwali a kutha osheendo showina okutala oopate moshitopolwa shaShana oshiwike shazi ko, okwa ti oopate ndhoka otadhi longwa meendelelo.
“Otendela yokulonga oopate oya pewa Kambwa Trading cc. Oondjila ndhoka dha teka po odho Onamutuku-Omapopo-Onkani oshowo Shoni-Onaanda-Omapopo, ndhoka dhili miikandjohogololo Okatana oshowo Uuvudhiya,” ta ti ngaaka. Lutombi okwa ti oopate adhihe dha teka po komeya miitopolwa yokonooli ayihe, Oshana, Omusati, Ohangwena oshowo Oshikoto otadhi ka pula oshimaliwa oomilliona N$230 opo dhi kale dha longwa. Ta popi kutya oondjila odha teteko aantu oyendji sho oshoka taya kambandhala okugandja ekwatho lyotango opo oopate dhi tulwe kumwe yaantu ya vule okwiinyenga.
“Ngaashingeyi oondjila otadhi ka tutilwa omavi dho tadhi tulwa ooshako dhomavi opo dhi vule okuya kumwe,” ta ti ngaaka.
Ta gwedha ko wo kutya ngele omeya ga shonopala otaya ka longa oopate ndhoka opo dhaatekepo we komeya.
Kansela gwoshikandjohogololo Elim Gerhard Shiimi ngoka a li mosheendo shokutala oopate okwa ti omeya oga teya po oohauto dhaantu oyendji.
“Otwa kala noku kambandhala naashoka ta tu vulu opo oohauto dhi pite oshoka ihaku piti oohauto oshona. Omeya ogendji go otaga tondoka,” ta popi ngaaka. Shiimi okwa ti, momeya moka oya toolamo oonomla dhiihauto dha thika 15, dha gwa koohauto.
Ta ti, omeya ogena oonkondo, noganika oshiponga, onkene otaya indile opo oopate dhi longwe momukalo ngoka itadhi vulu okuteka po komeya monakuyiwa.
David Sheehama goKambwa trading cc ngoka a pewa iilonga yoopate ndhoka okwa ti omasiku gopaasa sho tagaka thika oondjila ndhoka odha shuna kumwe. “Ota tu kalonga nuudhiginini opo tu vule okukala twa mana momasiku ngoka twa lombwelwa,” ta popi ngaaka.